Prej javësh Mario Dajsinani ka fituar statusin e titullarit, duke ulur në stol Aldo Teqjan. Përtej emocioneve që pati në fillim, tashmë portieri po i shijon ndeshjet e tij me Skënderbeun. Gjatë konferencës së dhënë dje për mediat, i riu thekson se skuadra do të gjejë kthesën dhe do të mbetet në pjesën e sipërme të renditjes.
Jeni kthyer në titullar të padiskutueshëm në portë, si ndiheni?
Të them të drejtën, fillimi ka qenë paksa emocionues. Përveçse m’u besua porta në një moment të vështirë, ishte edhe pjesa e debutimit në Superiore që ma bëri akoma më të vështirë. Emocionet kanë qenë të mëdha, por më pas gjithçka ka kaluar me kohën.
Ekipi po pëson shumë, a e shihni edhe ju si shqetësim në prapavijë?
Nuk është vetëm mbrojtja që ka peshën e fajit, por i gjithë ekipi. Ajo që na penalizon është fakti se jemi djem të rinj dhe pa eksperiencën e mjaftueshme dhe në situata të veçanta çedojmë. Na duhet ende pak kohë që të fitojmë përvojën e duhur dhe të përmirësohemi në çdo aspekt. Ajo që ka rëndësi për tani është fakti se duhet ta nisim atje ku e lamë me Teutën. Dhe për këtë trajneri na ka folur mjaft këto ditë.
Rivaliteti me Teqjan si ju duket, çfarë bisedoni me njëri-tjetrin?
Me Aldon kam shkuar shumë mirë në çdo moment si kur ka qenë ai titullar dhe tani që jam unë. Kemi marrëdhënie shumë të mira dhe gjithmonë mundohemi të karikojmë njëri-tjetrin në çdo moment të vështirë që kalon.
Skënderbeu ka dalë jashtë objektivave sezonalë pas gjithë këtyre rezultateve negative. Çfarë synoni nga javët e mbetura?
Përderisa janë mundësitë dhe ka ende plot ndeshje, mund të them se nuk do të dorëzohemi. Do të kërkojmë maksimumin tonë në takimin e radhës, duke i marrë të gjitha një e nga një. Në të tilla kushte mund të ecim përpara. Jam i bindur se Skënderbeu mbetet në pjesën e sipërme të renditjes, kjo nuk ka dyshim.
