Skënderbeu do të kërkojë maksimumin kundër Kukësit. Dhe për ta bërë një gjë të tillë, Orges Shehi duket se ka evidentuar edhe problemin e bardhekuqve në ndeshjet e fundit. Ajo që shqetëson trajnerin është fakti se ekipi pëson gola pa fund. Kjo vjen sa nga mungesa e përqendrimit aq edhe gabimet e vazhdueshme individuale të lojtarëve. Për këtë, stafi teknik ka dhënë “leksione” gjatë seancës së zhvilluar dje. Ajo që ka rënë në sy ishte fakti që për 20 minuta, Shehi ka bërë një analizë të detajuar në dhomat e zhveshjes.
Me ndihmën e një tabele, ai ka bërë që të gjitha skemat e vendosjes së skuadrës në fushë, qoftë kur kanë zotërimin e topit, daljet në sulm apo edhe vendosjen në fazën defensive. Në të tilla kushte, numri një i pankinës korçare ka kërkuar kthjelltësi dhe përqendrim nga çdo futbollist që do të jetë në fushën e lojës. Ajo që Shehi pret është që të përsëriten 30 minutat e fundit ndaj Teutës, ku bardhekuqtë me të vërtetë zhvilluan një lojë të mirë dhe cilësore.
Pas analizës në tabelë, grupi u zhvendos në fushë, aty ku punuan më shumë taktikisht. Gjithçka u tha në analizë, u vendos në praktikë. Edhe në punën me topin, trajneri i ka kushtuar më shumë vëmendje anës defensive.
Duke ditur aftësitë që Kukësi ka në fazën sulmuese, ai është munduar që të marrë të gjitha masat e nevojshme, në mënyrë që të ketë një mbrojtje solide. Për këtë, trajneri i skuadrës së Skënderbeut ka kërkuar nga reparti defensiv jo vetëm mosçorientim në kohë dhe hapësirë, por mbi të gjitha dublim dhe përgjegjshmëri në çdo aksion nga fillimi i lojës edhe deri në fundin e saj.
Gjithsesi, nga ana tjetër ajo që mbetet për t’u nënvizuar është fakti se korçarët po punojnë më së shumti me aspektin psikologjik që ka krijuar jo pak probleme në javët e fundit. E njëjta gjë pritet të vijojë deri ditën e enjte, kur korçarët do të mbyllin përgatitjet, që do të kulmojnë edhe me video-analizë të kundërshtarit.
