Oliver Kahn ka folur për planet e tija në të ardhmen me skuadrën e Bajernit të Mynihut. Ai ka menduar që në fillim të marrë një rol drejtuesi dhe më pas të synoi për më lart. 49-vjeçari pritet të jetë pasardhësi i drejtorit ekzekutiv, Karl-Hainc Rumenige.
“Në fillim duhet të mësoj shumë se si funksionon klubi i Bajernit në tërësi. Kam kaluar 14 vite me bavarezët duke fituar shumë trofe. Jam shumë i lidhur me këtë klub, ndaj jam gati për të marrë përgjegjësi. Por në fillim duhet të marr një rol që më shkon, që di ta bëj”, u shpreh Kahn. “Der Titan”, ashtu siç thërritet në Mynih, nuk beson te një dështim në fillimet e tij si drejtues. “Në momentin që do ta ndaj mendjen për të pranuar këtë sfidë nuk do të ketë më kthim prapa”, shpjegon ai.
“Kombinimi i shumë eksperiencave të mia si lojtar në fushën e lojës dhe si analist prej 10 vitesh në studiot televizive do të jenë një armë më shumë për ta përballuar këtë detyrë të re”. Klubi i Bajernit bën pjesë në pesë klubet më të mira në botë dhe për këtë Kahn shpreson të mbajë klubin edhe në të ardhmen. “Mia san mia? Këtë rresht nuk mund ta blesh në “Transfermakt”. Ato fjalë përfaqësojnë të gjithë identitetin e klubit të Bajernit, karakteristikat e një klubi familjar, që është mirënjohës për atë çfarë japin lojtarët në fushën e lojës. Këto janë vlera që përjetohen dhe nuk zhduken në sirtarë, kjo është ajo çfarë e bën këtë klub të madh”.
Oliver Kahn duket se është i duhuri për skuadrën më të titulluar në Gjermani. Shumë tifozë, por edhe ish-lojtarë të Bajernit, duke u nisur nga dashuria që ka ai për klubin, e shohin atë si njeriun e duhur për të marrë një rol drejtues të Bajerni. Lotar Matues u shpreh para disa ditësh së Kahn është i destinuar për këtë rol. Duket se Oliver dhe Bajerni janë bërë për njëri-tjetrin./Boldnews.al/
