Sulmuesi i Ajaxit, Dusan Tadic, ka thënë se paraqitja e tij e mirë në ndeshjen kundër Real Madridit ka ardhur si pasojë e videove të shumta të Zinedine Zidane që ai i ka shikuar. Paraqitja e tij ndihmoi që Ajaxi ta eliminojë Real Madridin nga Liga e Kampionëve, me rezultat të përgjithshëm 5:3.
Tadici e drejtoi skuadrën e Ajaxit, e cila e mposhti kampionin në fuqi të Evropës me rezultat 4:1, në Santiago Bernabeu. Kjo ishte disfata më e rëndë që Real Madridi e ka pësuar në shtëpi, në ndeshjet e Ligës së Kampionëve, transmeton Gazeta Express.
Sulmuesi serb u inspirua nga paraqitjet e ish-trajnerit të Real Madridit, Zinedine Zidane, për golin e parë të ndeshjes, në minutën e shtatë të ndeshjes. Këtë gol, të shënuar nga Hakim Ziyech, e asistoi Tadici.
Tadici e asistoi edhe golin e dytë, të shënuar nga David Neres. Më vonë, pasi filloi pjesa e dytë e ndeshjes, Tadici arriti ta përmirësojë edhe më tej rezultatin e ndeshjes, duke e shënuar edhe një gol.
“Kjo është ndoshta ndeshja më e mirë e futbollit që e kam luajtur ndonjëherë. Ne e mposhtëm klubin më të mirë në botë. Jam shumë krenar dhe mendoj se i kemi bërë shumë njerëz të lumtur”, ka thënë Tadic.
“Në futboll, duhet të qetësohesh dhe ta shijosh lojën. Ne e kemi një skuadër shumë të mirë dhe luajmë futboll të mirë. Zidane ishte lojtari im i preferuar. Ndoshta i kam shikuar shumë video të tij”.
