Kryeministri Edi Rama dhe kreu i opozitës, Lulzim Basha, patën një përballje në emisionin “Porta a Porta” të Bruno Vespas në gjigandin Italian RAI.
Në një kohë që Rama ishte i pranishëm në studio, në emission u transmetua një intervistë e kreut demokrat, Lulzim Basha, i cili tha se me paratë e drogës u blenë zgjedhjet, policët, mediat.
“Vitin e kaluar Shqipëria ka patur me trafikun e drogës, dhe me milionet e drogës u blenë, votat, policia, media etj. Dy muaj më parë mediat ndërkombëtare kanë publikuar disa përgjime të prokurorisë për zyrtarë të lartë të PS-së, ku vërtëtohet se ka patur kontakte me bosët e drogës për të blerë votat, për të indimiduar opozitën në zgjedhjet e shkuara”, tha Basha në emision.
Në përgjigje të deklarimeve të Bashës, ka reaguar Rama. Ky i fundit tha se raportet më të besueshme janë ato të Guardia Di Finanza, që sipas tij tregojnë luftën reale që është bërë me drogën.
Por në ndihmë të Ramës në studio ishte dhe drejtori sportiv i Lazios, Igli Tare, i cili u shpreh se protestat e dhunshme nuk janë imazhi që i shërben vendit.
“Shpresoj që opozita të kthehet në parlament për të diskutuar problemet që kemi. Dy ditë më parë kam lexuar një intervistë nga një artist i njohur shqiptar,i cili duke iu referuar imazhit të një gome të djegur përpara parlamentit, deklaronte se do ti duheshin të paktën 200 koncerte për të pastruar imazhin e vendit.
Mendoj të njëtën gjë, Shqipëria ka vuajtur shumë në të kaluarën dhe njerëzit tanë meritojnë çdo të mirë.
Ne jemi pro Evropës dhe në rritje, kështu që problemet duhet të zgjidhen në shtëpi dhe me përgjegjësi të madhe”, tha Tare.
