Nga Boldnews.al
Është viti 2016, mesi i verës, Shqipëria gjallonte nga bima trullosëse kanabis sativa, ndërsa ish-ambasadorja Romana Vlahutin, zbriti në fushën e gjelbër të stadiumit “Selman Stërmasi” me fustan transparent, duke takuar një më një “lojtarët e famshëm”, Saimir Tahiri, (me tatuazh në këmbë), Bledi Çuçi, Blendi Klosi, Erion Veliaj, Arben Ahmetaj dhe të tjerë personazhe.
Nga ana tjetër, kundërshtarë në futboll ishin përfaqësues të ambasadorëve të huaj në vendin tonë. Takimi u mbyll 3-3, shënoi Saimiri një gol të bukur, me driblime e futje topi nën shalë, aq sa mahniti Romana Vlahutinin, që nuk dinte si të festonte, të duartrokiste Tahirin, apo të lutej që edhe Veliaj ta bënte një gol.
Atë ditë media u mor vetëm me këtë ngjarje të madhe… Nga zyra e ambasadës së BE-së në Tiranë shkonin lajme të mira drejt Brukselit. Në Shqipëri gjithçka funksionon më së miri, qeveria po punon, droga është duke u luftuar si kurrë më parë, korrupsioni është në nivele minimale dhe qeveria ka vullnet për ta luftuar.
Romana raportonte, shefja e “madhe” në BE, Frederika Mogerini kënaqej dhe bëheshin gati për lëvdatën e radhës. Sigurisht nuk mungonin takimet me “liderin rajonal” Edi Ramën, që çudiste Brukselin me veshjet dhe sqimën e tij që e karakterizon në çdo aspekt.
Të dy kishin të përbashkëta, vijnë nga shkolla “Soros”, me mbështetje dhe ide të qarta se ku do të arrinin. Për Shqipërinë gjithnjë raportohej stabilitet, por krimi i organizuar, korrupsioni dhe vaçanërisht trafiku i drogës sollën probleme të mëdha në vend, vëçanërisht në vitin 2017, e nuk kishte Romanë transparente që e mbulonte të vërtetën e trishtë.
Saimiri që bënte gola dhe mrekullonte ambasadoren, ra me një lëvizje të shpejtë të kryeministrit Rama që për të shpëtuar veten ishte i gatshëm të sakrifikonte këdo bashkëpunëtor të tij. Brukseli ende mbante raporte pozitive për Shqipërinë. Asnjë përfaqësues i huaj nuk ngriti alarmin mbi kanalizimin e vendit, askush në Tiranë nga gratë e pushtetshme këtu, por anonime në Bruksel nuk thonin të vërtetën.
Lidhja e politikës me krimin, implikimi i drejtëpërdrejtë i zyrtarëve të lartë dhe të policisë në kultivimin dhe trafikun e drogës ishin “detaje pa rëndësi”, për vendet e zhvilluara të BE-së. Edhe atëherë kur trashej zullumi, gratë e skalionit të parë të raportimeve, i vinin në ndihmë qeverisë Rama dhe vetë atij. Veçohet edhe Manja Koçiançiç. Gjithnjë fjalë të mira, standarde dhe në tentativë për të treguar balancë, që kurrë nuk ndodhi.
Së fundi edhe një zonjë tjetër më ngulm iu bashkua “Vathës së Rilindjes”. Është Eurodeputetja Monika Macovei, komentet për të janë të tepërta, mjafton ti citosh deklaratën. “Unë besoj se qeveria aktuale është në rrugën e duhur, në transformimin e sistemit gjyqësor të vendit. Reforma në drejtësi ka sjellë rezultate të prekshme në luftën kundër korrupsionit dhe krimit të organizuar. Fatkeqësisht, veprimet e fundit të opozitës rrezikojnë të demtojnë ritmin e këtyre reformave dhe po dërgojnë mesazhin e gabuar tek parnerët europianë”-deklaroi ajo, jo më larg se dje.
Një qëndrim që edhe Elisa Spiropali do të përbahej për ta thënë, jo se është “realiste”, por të paktën shmang mllefin qytetar në rrjetet sociale. Po ky është skalioni i parë e konsumit të deklaratave. Gjithëkush ka “gruan” e tij në BE që të mbron, Rama ka shumë, por edhe ish-qeveria Berisha mbahej me deklaratat e një zonje, Doris Pak quhej, shumë e njohin. Edhe atëherë kur vendi qeverisej keq, ajo jepte një Shqipëri ndryshe!
Gratë që mundohen të përfaqësojnë BE-në, janë ende të turbullta me dashje, duke mbajtur qëndrime pro qeverisë, edhe atëherë kur vendi është në pragun e një kaosi politik e civil; kur papunësia po na mbyt, kur qeveria arrogante ja ka shitur vendin pesë aligarkëve; kur çdo tender është një mundësi për vjedhje dhe kur drejtësia është në lakun e qeverisë.
