Nga Boldnews.al
Prokuroria e Përgjithshme ka hapur garën për të zëvendësuar anëtaren e Këshillit të Lartë të Prokurorisë, Antoneta Sevdari, e cila u shkarkua pak ditë më parë nga Kolegji i Posaçëm i Apelimit.
Institucioni i drejtuar nga Arta Marku ka publikuar një njoftim në faqen zyrtare të internetit, në të cilën u bën thirrje të gjithë prokurorëve që plotësojnë kriteret ligjore, për të aplikuar për vendin vakant në Këshillin e Lartë të Prokurorisë (KLP).
Përtej dyshimeve mbi faktin nëse duhej rihapur gara nga e para, apo duhej që vendin e Sevdarit ta merrte prokurori Dritan Prençi, i cili nuk arriti të merrte numrin e votave të mjaftueshme për anëtarësim në Mbledhjen e Përgjithshme të Prokurorëve, të zhvilluar në Dhjetor 2018, qëllimi i këtij shkrimi lidhet me cilësinë e gjuhës shqipe të përdorur në njoftimin zyrtar.
Redaksia e “Boldnews.al” arriti të shquante, me vështirësi, se çfarë ka dashur të shprehë Kryeprokurorja e Përkohshme, Arta Marku, në njoftimin e publikuar në faqen zyrtare të internetit të Prokurorisë së Përgjithshme.
Në një tekst me vetëm një fjali, redaksia arriti të identifikonte të paktën 9 gabime trashanike gramatikore.
Prokurorja e Përgjithshme e Përkohshme, Arta Marku, u konfirmua në detyrë nga Komisioni i Pavarur i Kualifikimit, pavarësisht se Operacioni Ndërkombëtar i Monitorimit (ONM) vendosi pikëpyetje mbi profesionalizmin e saj.
Pavarësisht konfirmimit, Arta Marku nuk tenton të shuajë dyshimet e ngritura nga përfaqësuesi i ONM. Përkundrazi, ky njoftim zyrtar, i gjendur në foto, është një tjetër tregues për cilësinë e saj.
