Nga Boldnews.al
Është viti 2019, Marsi po mbars deputetë. Kohët kanë shkarë dhe gjithçka është meritë e Rilindjes. Ka ndryshuar koncepti deputet, që për të marrë atë mandat të duheshin të paktën dy kritere kryesore; të ishin të afërt me kryetarët e partive; ose parellinj të mëdhenj, që në një formë apo tjetër arrinin ta blinin atë mandat deputeti.
Kushdo tjetër që futej si intelektual, vinte e dilte me kuti votimi të boshatisura, duke marrë zhgënjimin para forcës “logjike” të parasë që hidhej lumë. Po na qeveris Rilindja, ndaj jo më kot kryeministri Edi Rama ka koncept krejt të ndryshëm, madje unikal në botë për të bërë shtet. Vetëm një mendje e pazakontë si Rama mund të arrijë deri aty sa të paguajë personazhe të ndryshëm që ata të marrin mandatin e deputetit. Për më shumë “kundërshtarët” politik…
Pas djegies së mandateve të opozitës, qeveria po punon fort për të krijuar një Parlament kukull, me përngjashmëri të fortë sistemi autoritar sa për të pasur si imazh një gjoja opozitë. Po qëmtojnë një e nga një listat poshtë të përfaqësuesve të opozitës. Deri më tani ata që kanë dalë në “tregun e hapur” janë disa përfaqësues të LSI-së, ku katër prej tyre sot zyrtarisht janë deputetët e rinj.
Gjithashtu edhe përfaqësues të PD-së, të rreshtuar sa për formalitet në fundin e listave, në ditët në vijim po presin momentin për të dërguar formularin e dekriminalizit në KQZ dhe më pas të zenë vend në një Parlament, në atë sallë ku parlamentarizmi ka rënë që më 21 shkurt, teksa e gjithz në bllok, opozita dorëzoi formularin që hiqnin dorë nga mandati i deputetit.
Lista e PD-së edhe edhe më interesante në emra, ku një prej tyre mbetet personazhi Lefter Maliqi, një i “djathtë ekstrem”, që u kthye në një të “majtë ekstrem”… Ai aktualisht është zëvendësdrejtor i Përgjithshëm i Burgjeve, një rrogtar i pushtetit, por do të bëjë “opozitarin” në Parlament, duke prenuar mandatin e deputetit.
Gjithashtu ka edhe dyshime të forta se shumë prej emrave të fundlistave po bëjnë pazare të hapura, që krahas të qenit deputetë, kërkojnë edhe bonuse nga qeveria. Kjo e fundit është e interesuar për të “zëvendësuar opozitën” me personazhe lehtësisht të shitshim, ndaj koncepti duhet të paguash që të bëhesh deputet ka rënë. Tashmë të paguajnë për të marrë mandatin, madje mirë…
Padyshim që kjo mbetet edhe një njollë për vetë partitë opozitare që kanë përfshirë në lista persona të cilët si “bindje politike” kanë paranë dhe pushtetin.
