Nga Boldnews.al
Këshilli i Emërimeve në Drejtësi (KED), një strukturë me mandat 1-vjeçar, ka hapur garën për zgjedhjen e Inspektorit të Lartë të Drejtësisë, ndërkohë që një pjesë e anëtarëve të tij nuk mund të ushtrojnë mandatin e tyre, për shkak se nuk kanë kaluar Vetingun.
Kjo lëvizje bie në kundërshtim me standartin e vendosur nga KED e kaluar. Këshilli i kaluar, me propozimin e Kryetarit të Komisionit të Ligjeve, Ulsi Manja, vendosi që fillimisht anëtarët e KED të kalonin në Veting dhe më pas të vijonin shqyrtimin e kandidaturave për anëtarët e Gjykatës Kushtetuese dhe të Inspektorit të Lartë të Drejtësisë.
Ndërhyrja e Manjës u komentua si një manovër për të bllokuar veprimtarinë e KED-së, e përbërë nga anëtarë të cilët nuk kontrolloheshin nga maxhoranca. Gjithësesi, “porosia” e dr. Ulsiut, u zbatua.
Anëtarët e KED të vitit të kaluar u përfshinë të gjithë në Veting. Në përfundim të procesit, pjesa më e madhe e tyre, u shkarkuan nga detyra, duke e bërë të pamundur vijimin e punës së tij.
Në Dhjetor 2018, Parlamenti zgjodhi anëtarët e rinj të KED, në një procedurë të shoqëruar me dyshime të forta për paligjshmërinë e tij. Presidenti i Republikës, i cili është institucioni i parë që duhet të organizojë shortin për përzgjedhjen e anëtarëve me mandat 1-vjeçar të Këshillit të Emërimeve në Drejtësi, refuzoi të organizonte procesin.
Presidenti Meta deklaroi në atë kohë se ka vakum ligjor për përzgjedhjen e anëtarëve të KED. Pas refuzimit të kreut të Shtetit, procedurën e zhvilloi Parlamenti. Shorti përzgjodhi si kryetar anëtarin e Gjykatës së Lartë, Ardian Dvorani, i njohur për afërsinë e tij të madhe me Partinë Socialiste.
Gjithashtu, në KED u përzgjodh pa short, për shkak të mungesës së kandidaturave, edhe Kryeprokurorja e Përkohshme, Arta Marku, e zgjedhur në këtë detyrë vetëm me 69 votat e Partisë Socialiste.
Tashmë që KED drejtohet nga njerëz shumë pranë Partisë Socialiste, ky institucion ka vendosur të hapë procedurën për Inspektorin e Lartë të Drejtësisë, një strukturë që ka për detyrë inspektimin periodik të punës së gjithë gjyqtarëve dhe prokurorëve të Republikës së Shqipërisë.
Iniciativa e KED për të hapur shortin për Inspektorin e Drejtësisë është ndërmarrë para se të gjithë anëtarët e tij të kalojnë Vetingun.
Aktualisht, në Këshillin e Emërimeve në Drejtësi janë 7 anëtarë, nga 9 që duhet të ishin. Dy vende janë vakante. njëri i cili u krijua pas shkarkimit të Kryetarit të Gjykatës Kushtetuese, Bashkim Dedja. Vakanca tjetër u krijua për shkak se nuk kishte kandidatura nga Prokuroritë e Apelit që të plotësonin kriteret ligjore për t’u shortuar në procedurën për anëtar të Këshillit të Emërimeve në Drejtësi.
Nga 7 anëtarët në detyrë të KED, 5 prej tyre kanë kaluar procesin e Vetingut. Konkretisht, janë konfirmuar në detyrë; kryetari Ardian Dvorani, gjyqtarja Kushtetuese, Vitore Tusha, Kryeprokurorja e Përkohshme, Arta Marku, prokurorja e Apelit, Fatjona Memçaj, si edhe gjyqtari i Administratives së Tiranës, Eriol Roshi.
Ndërkohë, janë në proces Vetingu anëtarët Margarita Buhali, gjyqtare në Apelin e Vlorës dhe Fatri Islamaj gjyqtar në Apelin e Tiranës.
Gjithashtu, në proces Vetingu janë edhe anëtarët zëvendësues; Gurali Brahimllari nga Gjykata e Apelit për Krime të Rënda dhe Klodiana Veizi (Mema) nga gjykata Administrative Durrës.
Pra, praktikisht, Këshilli i Emërimeve në Drejtësi, nuk duhet të funksionojë, derisa të gjithë anëtarët e tij të kalojnë në procesin e Vetingut. Këtë “porosi” la vitin e kaluar kreu i Komisionit Parlamentar të Ligjeve, Ulsi Manja. Por deputeti i maxhorancës nuk ka dhënë asnjë koment për procedurën e nisur nga “njeriu i tyre” në Këshillin e Emërimeve në Drejtësi, Ardian Dvorani.
