Për kreun e PDK-së, Nard Ndoka, kryeministri Edi Rama është tashmë jashtë sistemit ndaj duhet të largohet, dhe kjo është një përgjegjësi kombëtare e opozitës. Ai përdori edhe një batutë kur tha se Rama është kapur me presh në dorë. “Çdo kosto ka vetëm një emër Edi Rama, është kapur me presh në dorë dhe do ta largojmë me presh aty ku nuk thuhet”, u shpreh Ndoka.
Ai paralajmëroi vijimin e protestave nga opozita, derisa kryeministri të firmosë tërheqjen dhe krijimin e një qeverie kalimtare për të çuar vendin në zgjedhje të parakohshme.
“Është momenti final. Çdo ditë nën qeverisjen e Edi Ramës është një fatkeqësi kombëtare, dhe këtë edhe vetë Rama e kupton. Ai personalisht nuk ka mundësi të dialogojë me opozitën, të firmosë një marrëveshje me opozitën. Prandaj e para është largimi i tij dhe më pas do të jetë një rrugë e hapur për mënyrën se si do të kemi një qeverisje për zgjedhjet e parakohshme”, -tha Ndoka, në studion e News 24.
