Interpol Tirana ekstradon nga Greqia Gëzim Tomën, i dënuar me 20 vite burg për veprat penale “Mbajtja pa leje dhe prodhimi i armëve dhe i municionit”, “Largimi i të burgosurit nga vendi i qëndrimit” dhe “Vjedhja me dhunë”.
“Në datë 29.11.2013, pas një bashkëpunimi me autoritetet policore greke, u bë arrestimi në Athinë, Greqi i shtetasit Gëzim Toma, 37 vjeç, me qëllim ekstradimin drejt vendit tonë pasi Gjykata e Rrethit Gjyqësor Korçë, e ka dënuar këtë shtetas me 20 vite burg për tre veprat penale të lartpërmendura”, thuhet në njoftimin zyrtar të Policisë së Shtetit.
Arratisja dhe arrestimi në Greqi
Gëzim Toma, ka qenë duke vuajtur dënimin në burgun e sigurisë së lartë në Drenovë të Korçës, për veprën penale “Vrasja me dashje” kryer në bashkëpunim, si autor i vrasjes së një 25-vjeçari, ngjarje e ndodhur në Krastë, Martanesh. Në datë 23.11.2013, duke kërcënuar me armë gardianët, ky shtetas është arratisur nga ambientet e burgut.
Bashkë me Tomën, më 23 nëntor të 5 viteve më parë, u arratisën edhe 6 të dënuar të tjerë. Toma u arrestua në Greqi disa ditë pas arratisjes, në fshatin Elaptaora në malet e Kosturit. Me të ishin edhe dy të arratisur të tjerë, të cilët pas një përleshje me forcat e policisë helene, siç raportuan asokohe mediat greke, i shpëtuan policisë, për tu vënë në pranga më pas. /Boldnews.al/
