Nga Boldnews.al
Malli për atdheun ndër të pranishëm, u shua në momentin kur kryeministri kapi podiumin në Samitin e Diasporës. Ishte padyshim personazhi më grotesk dhe për evenimente të tilla të gjata, me fjalime të shumta, fort të bezdishme kur protagonizmin e marrin politikanë, gjithnjë ka nevojë për pak humor dhe atë më mirë se Edi Rama nuk mund ta bënte kush.
Gajasja duhet të ishte e madhe, por për etikë shumë të pranishëm e mbajtën të qeshurën e zgjatur. “Ka ikur koha kur partia kontrollonte drejtësinë”-tha Rama ndër frazat e para. Seriozitet me të cilën e transmetoi këtë thënie lapidar, për pak shtangu të pranishmit, në dyzim për të qeshur apo ta merrnin seriozisht.
“Po flasim për luftën më të madhe që i është hapur ndonjëherë korrupsionit në Shqipëri, si luftohet? Me një sistem drejtësie që bëhet armik i betuar i korrupsionit. Prokurorë dhe gjykatës në nivele më larta sot janë jashtë sistemit, hap pas hapi po ndërtohet sistemi i ri. Janë dyfishuar eksportet, në këto dy vite sipas agjencive të specializuara ndërkombëtare ka ndodhur çrrënjosja e gjithë plantacione të kanabisit që i gjeta aty kur nisëm luftën duke e vendosur problemin në rendin e ditës, Lazarati ka qenë aty”, tha Rama.
Pjesë e drejtësisë, madje fort kyçe është prokuroria. Ky institucion për afër një vit e gjysëm drejtohet nga Arta Marku. Një e përzgjedhur direkte e qeverisë dhe për më shumë u zgjodh me 69 vota vetëm të mazhorancës. Prokurorja e Përgjithshme e Përkohëshme, po bëhet e “përhershme” në mbylljen e dosjeve të zyrtarëve të lartë publik.
Në më shumë se një vit drejtim, nuk ka marrë të pandehur, qoftë edhe për statistikë, asnjë drejtues të lartë politik dhe të administratës shtetërore. Kjo është drejtësia e re që po çudit botën… I ndalur në luftën kundër drogës, Rama nuk i shpëtoi dot nënqeshjes së shumë të pranishmëve, me përjashtim të rreshtit të parë që përbëhej nga ministra dhe zëvendësministra të kabinetit të tij.
Është aktor i madh humori, pasi me batutat e tij ai kurrë nuk qesh vetë. I lindur për atë punë… Tha se shkatërruam Lazaratin, por harroi që lazaratizoi gjithë Shqipërinë. Droga mbyti vendin në çdo cep, aq sa ishte e pamundur të gjejë punëtorë për ndërtim apo me fasoneri, pasi të gjithë rendnin pas kanabisit. Italia dhe Greqia, si dy vendet e para pritëse të drogës, gati sa nuk shpallën gjendjen e jashtëzakonshme në vitet 2016-2017, kur deti e toka mbulohej nga tonelata drogë.
Ish-ministri më i suksesshëm i qeverisë “Rama 1”, Saimir Tahiri dje u njoh me akuzat e rënda të trafikut ndërkombëtar të lëndëve narkotike në kuadër të grupit të strukturuar kriminal dhe korrupsion pasiv. Shtatë oficerë të lartë të policisë së shtetit janë ende në kërkim për favorizimin e trafikantëve të drogës. Po çfarë janë këto shifra para fjalimit të Ramës…?!
Në fund, kryeministri e mbylli me një thënie edhe më brilante. “Ka ikur koha kur Shqipëria trajtohej si pronë private”… Kjo ishte e tepërt në humorin e tij të zi. Sot, e gjithë Shqipëria është dhënë me konçension, ajo në fakt është pronë private e pesë oligarkëve të lidhur drejtëpërdrejtë me pushtetin…
Qeshni bashkaatdhetarë tanë të diasporës, në mos në sallë futuni në ndonjë qoshëze të ambienteve ku qeveria vetëm për dekor shpenzoi 670 milionë lekë dhe gajasuni me deklaratat e kryeministrit. Më pas shkoni tek të afërmit tuaj dhe pyetini si jetojnë… Me siguri do ju kërkojnë ndonjë borzh nga hallet e shumta që po ua marrin jetën gradualisht çdo ditë. Ata janë Shqipëria e vërtetë, përtej pamjes vituale që jep Rama me përfaqësuesit e tij!
