Sergio Ramos është pezulluar nga UEFA me dy ndeshje, çka do të thotë se do të humbasë takimin e kthimit me Ajaxin si dhe me kundërshtarin e mundshëm që Real Madridi do të ketë në çerekfinale në rast kalimi.
Komiteti Disiplinor i UEFA-s ka vendosur që ta dënojë Ramosin pasi e mori me qëllim një karton të verdhë kundër Ajaxit në ndeshjen e parë të 1/8 së finales në Ligën e Kampionëve më 13 shkurt.
Ramosi foli për gazetarë pas ndeshjes më 13 shkurt, duke pranuar se e kishte marrë me qëllim kartonin e verdhë.
“Duke e parë rezultatin, do të gënjeja nëse do të thosha se nuk e mora me qëllim kartonin”, pati thënë Ramos.
“Nuk e bëra për ta nënvlerësuar kundërshtarin apo për të menduar se kjo ndeshje është punë e kryer, ama në futboll duhet të marrësh vendime të vështira”, pati theksuar Ramos.
Më vonë, 32-vjeçari ndryshoi deklaratat duke thënë se nuk e kishte bërë me qëllim.
Por, UEFA vendosi të hapë rast ndaj tij dhe vendosi për ta pezulluar spanjollin, që do të humbasë ndeshjen e parë në çerekfinale, nëse Reali kalon Ajaxin.
Për një rast të njëjtë, Geoffrey Kondogbia i Valencias gjithashtu u pezullua me dy ndeshje.
