Studiuesi Vladimir Kola ka qenë i ftuar sot në studion e lajmeve në Fax News, ku ka komentuar dhe draftin e qeverisë për kontrollin dhe verifikimin e doktoraturave.
Sipas Kolës VKM-ja e qeverisë ka një sërë problematikash, për shkak se nuk ka të përcaktuar kohën se kur nis verifikimi i doktoraturave, dhe as software-in që përdoret.
‘’Lidhur me denoncimet që ne kemi bërë nga mediat ka pasur një interes të madh, po jo nga vetë personat e përfshirë dhe nga bota akademike. Drafti i propozuar nga ana e qeverisë nënkupton që Universitetet ti çojnë doktoraturat te Ministria e Arsimit dhe përmes një software të bëhet kontrollimi i tyre.
Nëse nuk gjendet doktoratura online është e vështirë që të bëhet kërkimi. Biblioteka Kombëtare ka një rregullore që unë duhet të marr leje nga autori për të bërë verifikimin e doktoraturave. Pse duhet të pres unë që të vdesë autori që të konsultoj doktoraturën?
Ka probleme me VKM-në e qeverisë, pasi nuk bëhet e ditur koha se kur do të niset verifikimi i doktoraturave, psh. nëse do të ishte pas 2000-shit.
Po ashtu ka probleme dhe me software-in, pasi doktoraturat që janë në shqip, duhet të ketë një software që të jetë po në shqip, në mënyrë që të identifikohen ngjashmëritë. Ky program mund të kapë vetëm autorët, pasi tekstet vështirë se mund të identifikohen”, u shpreh Kola.
Studiuesi tha më tej se plagjaturat në vendin tonë janë në masë, dhe sipas tij nuk është vetëm çështje paragrafësh, nuk është parafrazim, apo përpunim.
