Skënderbeu është duke kaluar një periudhë të errët, për sa u përket rezultateve të marra në javët e fundit. Dhe kjo normalisht që ka sjellë shqetësim te të gjithë ata që janë pjesë e futbollit në klubin korçar. I tillë është edhe rasti i Stavrion Lakos.
Ishkapiteni i Skënderbeut në fillimet e periudhës së artë të klubit korçar shpjegon pak a shumë situatën që është krijuar në klub. Lako thotë se për herë të fundit këto rezultate janë marrë në vitin 2007, atëherë kur Skënderbeu ra nga Kategoria Superiore për herë të fundit.
Lako, një bilanc negativ, nëntë ndeshje, 8 humbje. Kemi të bëjmë me krizë të thellë?
Sigurisht, ekipi është në krizë dhe kjo nuk ka as më të voglin dyshim. Është në krizë rezultati, në krizë morale dhe psikologjike. Nëse shohim lojën e zhvilluar nga Skënderbeu, bindesh se ekipi ka cilësi. Por është diçka, ndoshta një ngërç që ata nuk po e kalojnë dot.
Për çfarë ngërçi e keni fjalën?
Humbjet e njëpasnjëshme kanë lënë një shije dhe situatë aspak pozitive te lojtarët. Skënderbeu këtë vit është në tranzicion dhe kërkon që të marrë përgjigjet për sezonin e ardhshëm. Po të shikoni, kjo tregohet edhe nga përdorimi i elementëve të rinj në ekip. Por, në kushte të tilla kur humbjet vijnë njëra pas tjetrës është shumë e vështirë për ekipin që të reagojë, pasi lojtarët janë të rinj dhe pa eksperiencë, aq sa nuk e përballojnë dot presionin.
E keni fjalën vetëm për presionin që shkaktojnë humbjet…?
Jo vetëm për këtë. Kryesisht për humbjet, por edhe presioni që shkaktohet nga tifozët dhe opinioni mediatik. Nga një skuadër që diktonte kampionatin, tani është ndryshe, por ka edhe sezone të tilla. Ky Skënderbe është i ri në moshë, nuk duhet të ushtrohet presion qoftë për rezultatet, qoftë për renditjen, pasi lojtarët ngarkohen më shumë emocionalisht dhe më pas reagimi bëhet gati i pamundur.
Po, por si dilet nga kjo situatë? Janë shumë pikë që mungojnë…
Vetëm me qetësi. Unë jam i bindur se Orges Shehi duhet të lihet i qetë të punojë. Është i vetmi që di si ta nxjerrë ekipin nga kjo situatë e tillë, pasi e njeh mirë këtë ambient. Lojtarët nga ana tjetër duhet të marrin më shumë përsipër, të mundohen të marrin përdore këtë skuadër dhe të jenë më të kthjellët.
Po flitet shpesh se Skënderbeu është i varur nga Bregu. Ju si mendoni?
Dejvi Bregu është një lojtar i rëndësishëm dhe normalisht që çdo ekip do të ishte i varur nga ky lojtar nëse do të mungonte kaq gjatë. Mund të them se Skënderbeu nuk ka qenë i varur asnjëherë nga individët, por nga grupi. Prandaj Bregu është ajo pjesa më e rëndësishme e grupit pa të cilën “motori” nuk punon ashtu si duhet. Me rikthimin e tij jam i bindur se gjërat do të ndryshojnë.
Në ndeshjen ndaj Tiranës pamë edhe zemëratën e tifozëve. Si e gjykoni?
Një sjellje e gabuar. Për mendimin tim Skënderbeu ka më shumë nevojë për mbështetjen e tifozëve në këto momente sesa për akuzat dhe revoltimin e tyre. Nga njëra ana tifozët kanë të drejtë, pasi kërkojnë rezultat nga skuadra e tyre, por nuk është kjo mënyra më e mirë për ta kërkuar, aq më tepër tani.
/Panorama Sport/
