Martin Ndreca, 37-vjeçari i cili mbeti i vrarë me armë zjarri në Durrës, nuk ishte i vetëm në makinë kur u qëllua për vdekje me armë zjarri.
Sipas policisë lokale, krimi ka ndodhur rreth orës 01:10 të mëngjesit të kësaj të diele në lagjen e ish-kënetës dhe Ndue Zefi 37 vjeç është shpallur në kërkim si autor i dyshuar i vrasjes.
Autori dhe viktima, banorë në lagjen ku ndodhi vrasja, dyshohet se ishin në një lokal në zonë ku janë konfiktuar mes tyre.
Konflikt, që sipas policisë, lindi për motive të dobëta. Në momentin që Ndreca del nga lokali dhe shkon në makinë për tu larguar, Ndue Zefi e qëllon me automatik duke e lënë të vdekur brenda mjetit. Policia ka gjetur disa gëzhoja në vendngjarje, ç’ka dëshmon se mbi viktimën është qëlluar disa herë.
Në makinë, ishte dhe djali i viktimës, i cili nuk është plagosur nga të shtënat. Pas ngjarjes, për disa orë, ai ka dhënë dëshminë e tij rreth asaj që ndodhi.
“Më datë 24.02.2019, rreth orës 01:10, në lagjen Ish Kënetë, shtetasi N.Z. 37 vjeç, për motive të dobëta dyshohet se ka vrarë me armë zjarri shtetasin M.N., 45 vjeç, banues në kete lagje. Autori i dyshuar pas krimit është larguar menjëherë dhe është shpallur në kërkim. Policia po punon për kapjen e tij. Grupi Hetimor në bashkëpunim me Prokurorinë e Rrethit Gjyqësor Durrës po punojnë për zbardhjen e plotë të rrethanave te kësaj ngjarje”, njoftoi zyrtarisht Policia. /Boldnews.al/
