Edhe Fatmir Mediu, kryetari i PR-së, ka djegur në mënyrë simbolike mandatin e deputetit. Mësohet se kryerepublikani është kthyer këtë të diel nga Vjena ku mori pjesë në punimet e Asamblesë Parlamentare të OSBE. Ai i është drejtuar mesditën e sotme Kryesisë së Kuvendit ku edhe ka firmosur dorëzimin e mandatit.
Mediu i bashkohet kështu grupit të opozitës së bashkuar për të mos pasur më mandat parlamentar, por duke u rreshtuar përkrah qytetarëve në betejën për zgjedhje të lira dhe të ndershme. Opozita ka nisur një lëvizje protestash masive për të larguar Edi Ramën dhe krijuar një qeveri tranzitore e cila të çojë vendin në zgjedhje të parakohshme.
Kreu i PR ndodhej për një vizitë zyrtare në Vjenë dhe Bruksel dhe për këtë arsye nuk i ishte bashkuar grupit të madh të deputetëve opozitarë, që ndërmorën aktin e paprecedentë në Shqipëri pak ditë më parë. Një tjetër deputet i opozitës, Nard Ndoka, pritet të djegë mandatin e tij menjëherë pas kthimit nga Brukseli. Ndoka e konfirmoi një gjë të tillë pak ditë më parë.
Një tjetër deputete që ndodhet jashtë shtetit dhe që nuk ka firmosur ende djegien e mandatit është edhe Rudina Hajdari. I vetmi që doli kundër vendimit të demokratëve ishte Myslim Murrizi, por Kryesia e Partisë Demokratike vendosi ta përjashtonte nga radhët e saj pas këtij vendimi. Kundër djegies së mandateve ka dalë edhe Lefter Koka i LSI-së.
