Mbrëmjen e sotme disa të shtëna armësh në drejtim të një mjeti kanë trazuar dhe frikësuar banorët e qytetit të Korçës.
Krisma armësh janë dëgjuar rreth orës 22:00 në lagjen numër 4 të qytetit juglindor, por fatmirësisht nuk raportohet për të lënduar.
Autorët, të cilët mendohet se kanë qenë dy, kanë hapur zjarr duke qëlluar me breshëri kallashnikovi në drejtim të një automjeti tip ‘Touareg’, por brenda nuk ka pasur asnjë person.
Pronari i mjetit sipas të dhënave të para nga Korça, është person me precedent penal, por ka shpëtuar, pasi nuk ka qenë në makinë.
Ngjarja ka ndodhur pranë shkollës ‘Demokracia’ dhe ka shkaktuar panik dhe frikë te qytetarët e Korçës, ndërsa policia ka ngritur disa postblloqe për të prangosur autorët.
Njoftimi i policisë:
“Më datë 24.02.2019, rreth orës 21:45, në lagjen nr 4, dyshohet se është qëlluar me armë zjarri në drejtim të mjetit në pronësi të shtetasit Mateo Aliko, mjet i cili ishte i parkuar në rrugë.Grupi hetimor po punon për zbardhjen e rrethanave të ngjarjes, identifikimin dhe kapjen e autorëve”.
