Skënderbeu nuk arrin të lërë pas rezultatet negative. Korçarët janë mposhtur brenda në fushën e tyre nga Tirana me rezultatin 2-1.
Por ajo që të bie në sy pas kësaj ndeshje janë statistikat e regjistruar nga ana e ekipit korçar. Skënderbeu ka arritur të fitojë vetëm 1 nga 9 ndeshjet e fundit, praktikisht një fazë e tërë. Bardhekuqtë ia dolën të fitonin vetëm në ndeshjen ndaj Laçit duke mposhtur 2-0 kurbinasit. Më pas janë koleksionuar 8 humbje, duke mbledhur vetëm 3 pikë. Statistika këto të denja për një skuadër që pretendon mbijetesën, dhe jo për objektivat me të cilat korçarët u nisën në këtë sezon.
Nga ana tjetër, Tirana vazhdon serinë e rezultateve pozitive, ndërsa nuk ka pësuar ende asnjë humbje në këto 5 ndeshjet e para të fazës së tretë. Në këtë mënyrë, trajneri Ardian Mema mund t’a përgatisë i qetë sfidën e javës tjetër ndaj Partizanit, teksa triumfi në derbin e kryeqytetit është kthyer në një obsesion për 24-herë kampionët e vendit.
