Nuk ndalet kurrë stuhia përreth “trekëndëshit” Vanda-Ikardi-Maksi Lopez, duke prodhuar lajme dhe deklarata të tjera interesante të jetës së tyre të “trazuar” dhe të zhurmshme mediatikisht.
Këtë herë është i “tradhëtuari” Maksi Lopez që në një intervistë me gazetarin Fernando Niembro ka rrëfyer se si Vanda donte të bëhej menaxherja e tij.
“Vanda ka dashur të bëhet menaxherja ime. Ka shumë gra të afta për këtë punë, por nuk duhet ngatërruar profesioni me familjen, duhen mbajtur larg njëra-tjetrës. Duke parë se si kanë shkuar gjërat mes të gjitha zgjedhjeve të gabuara që kam bërë kjo ishte një zgjedhje e drejtë”, ka thënë Maksi Lopez.
Argjentinasi është rikthyer të flasë edhe për marrëdhënien e tij me fëmijët dhe çiftin Ikardi-Vanda. “Unë nuk i shoh më ata, është e njëjta histori. Unë kam qenë në disa klube në Itali që të jem pranë fëmijëve, por gjithmonë kam patur vëeshtirësi. Ikardit i kam thënë që kur të bëhesh baba do më kuptosh, por ai pasi u bë prind po bën edhe më keq. Ndaj vendosa që të mos kem më kontakte me ta. Dje ishte ditëlindja e njërit prej djemve të mi dhe kur i mora në telefon, ata ma mbyllën”, ka përfunduar Maksi Lopez.
