Përplasjet televizive mes përfaqësuesve të mazhorancës dhe opozitës, do ti mungojnë për disa kohë publikut shqiptar.
Kreu i Rilindasve, Edi Rama, ka urdhëruar të tijtë që të mos shfaqen në asnjë studio televizive ku të pranishëm mund të jenë dhe përfaqësuesit e opozitës.
Ky vendim i Ramës vjen menjëherë pasi opozita e bashkuar vendosi për djegien e mandateve.Ka qenë ‘Gazeta Si’, e cila bën me dije se Rama ka urdhëruar të tijët që debati me përfaqësuesit e opozitës do të zhvillohet vetëm në parlament dhe jo në studiot televizive.
Rama në kokën e tij bluan idenë se për sa kohë opozita injoron debatin në Kuvend, mazhoranca do të kundërpërgjigjet duke injoruar përplasjen me opozitën në studiot televizive. Lëvizja është një kundërpërgjigje e mazhorancës ndaj vendimit kolektiv të opozitës për të djegur mandatet.
Në mungesë të debatit në Kuvend dhe të atij nëpër studiot televizive, tashmë përplasja mes mazhorancës dhe opozitës është e zhvendosur totalisht në distancë. Kanalet kryesore të komunikimit do të jenë rrjetet sociale, por edhe konferencat për shtyp me akuza e kundërakuza, që në ditët e javët në vazhdim pritet që të jenë më të shpeshta nga të dyja kampet.
Më 21 shkurt, në përfundim të protestës së thirrur para Parlamentit, Lulzim Basha orientoi turmën në drejtim të Kryesisë së Kuvendit për të dorëzuar zyrtarisht kërkesën e lënies së mandateve në grup. Pas dorëzimit të mandateve nga ana e opozitës, Departamenti Amerikan i Shtetit, Brukseli zyrtar, por edhe kancelaritë krysore evropiane, e konsideruan si gabim veprimin e deputetëve të PD dhe LSI.
