Ujësjellësit kanë abuzuar me faturimet për konsumatorët e ujit. Është ky një nga konkluzionet që përfshin Enti Rregullator i Ujit në raportin për 2018, ku gjithashtu theksohet se ka ende hapësirë për rritje të çmimit të ujit në vend, nisur nga niveli i përballueshmërisë.
Sipas Entit Rregullator në vitin 2018 tendenca e çmimeve të ujit ka qenë rritëse, për shkak të performancës së dobët të ujësjellësve.
“ERRU përdor si kriter për përballueshmërinë e pagesës së faturës së shërbimeve UK, në nivelin prej 5% të të ardhurave mesatare mujore të një njësie ekonomike familjare, informacion që e përllogarit dhe e publikon INSTAT për të gjithë qarqet e Republikës së Shqipërisë. Këto vlera tregojnë se ka ende hapësirë në drejtim të aftësisë paguese për të përballuar rritjen e tarifave”, thuhet ndër të tjera në raport.
Gjithashtu, ERRU thekson se Ujësjellësit kanë abuzuar me faturimet aforfe në rastet kur familjarëve u ka munguar matësi duke zbatuar normativa të tjera dhe jo ato që janë caktuar nga Enti Rregullator i Ujit.
“Ankesat e paraqitura në ERRU me objekt “faturimi aforfe” zënë numrin më të madh të ankesave edhe gjatë vitit 2018. Shqetësues mbetet fakti që shoqëritë Ujësjellës kanalizime nuk kanë respektuar normativat e miratuara në rastet e faturimit aforfe 4.5 m3 në muaj për frymë për konsumatorët familjare, por kanë vijuar faturimin me normativa të miratuara me urdhër të brendshëm të organeve drejtuese të shoqërive Ujësjellës kanalizime në kundërshtim me aktet nënligjore në fuqi”, thuhet në raport.
Për vitin 2018, Enti Rregullator i Ujit thotë se ka miratuar rritjen e tarifave për 8 bashki të cilat kanë paraqitur aplikimet e tyre ndërsa është duke shqyrtuar kërkesat e 11 bashkive.
Ndërkohë referuar denoncimeve, ERRU shkruan se nëpërmjet trajtimit të ankesave të konsumatorëve, synon garantimin që shoqëritë UK të veprojnë në përputhje me rregulloren për furnizimin me ujë dhe kanalizimeve në zonën e shërbimit me kushtet e licencës së tyre, si dhe kushtet e përgjithshme të kontratës që ato kanë me konsumatorët.
Gjatë vitit 2018 ERRU ka shqyrtuar dhe trajtuar 39 ankesa të ardhura kryesisht nga konsumatorë familjarë, lidhur me faturimet, matësit, detyrimet etj.
Natyra e ankesave të paraqitura pranë ERRU-së kanë qenë mbi faturimin aforfe, zëvendësimin e shpeshtë të ujëmatësit pa respektuar procedurat, mosnjohjen e detyrimeve nga ana e konsumatorëve, problemet me kontratën për shërbime ujësjellës kanalizime, etj. Pjesa dërmuese e ankesave ka konsistuar për faturimin aforfe dhe për ndërrimin e shpeshtë të ujëmatësit.
ERRU i ka trajtuar me seriozitetin maksimal dhe me objektivitet këto ankesa duke i zgjidhur 10 prej tyre në favor të konsumatorëve.
Pjesa tjetër është zgjidhur me mirëkuptim ndërmjet palëve ose është akoma në proces.
