Skënderbeu-Tirana është ndeshja hapëse e javës së 23-të të Superiores. Nuk pritet të jetë një ndeshje aq e nxehtë si vitet e fundit, pasi dy skuadrat janë larg objektivit në kampionat, por përsëri mbetet një sfidë interesante, ku edhe tifozëria do të ketë rolin e vet. Mes shumë lojtarësh që kanë luajtur për të dy ekipet është edhe Erbim Fagu, i tërhequr nga futbolli për shkak të një dëmtimi të pësuar në kulmin e karrierës, kur mbante fanellën e Skënderbeut. Në një intervistë për “Vipsport.al”, ai analizon këtë ndeshje dhe thekson se ajo do të vendoset nga mesfushat, pasi aty do të përqendrohet loja. Fagu evidenton Krasniqin si lojtarin që mund të bëjë diferencën, ndërsa për Tiranën beson se mund të fitojë Kupën e Shqipërisë.
Skënderbeu dhe Tirana ndeshen për herë të tretë në këtë kampionat, në një situatë jo të mirë për të dy ekipet, larg objektivave të sezonit. Çfarë ndeshje!
Çfarë arashikon të premten në Korçë?
Te dyja skuadrat vijnë nga rezultate jo të mira dhe të dala nga objektivi i fillimit të sezonit. Gjithsesi, do të jetë një ndeshje e bukur për t’u parë, pasi këto skuadra gjithmonë kanë dhuruar ndeshje spektakolare, pavarësisht situatave. E shikoj Tiranën disi me të avantazhuar, pasi kanë një rritje nga fizike dhe psikologjike. Skënderbeu duket tashmë se ka rënë në gjendje “kome” dhe duket sikur e ka të vështirë të marrë veten.
Duke pasur parasysh organikën aktuale të dy skuadrave, cilët lojtarë mund të jenë faktor në këtë ndeshje?
Po të shikosh të dyja skuadrat, nuk është se kanë ndonjë lojtar, i cili ka aftësitë që ta marrë grupin për dore dhe ta udhëheqë, por mendoj që faktori që do të ndikojë në këtë ndeshje, do të jenë repartet e mesfushës, pasi aty dhe do të përqendrohet më shumë loja. Por, nëse do të flisnim për një lojtar, Krasniqi mund të jetë ai që do të bëjë diferencën në këtë ndeshje.
Sa ndikon faktori-fushë për Skënderbeun, që luan në fushën e tij dhe ju e keni provuar atmosferën e atij stadiumi?
Me thënë të drejtën, faktori fushë për Skënderbeun ndikon shumë, pasi dihet që ka një tifozëri të zjarrtë. Shpresoj shume që stadiumi të jetë i mbushur plot, si në vitet e kaluara, pasi një ndeshje e tillë pa tifozë nuk do të kishte kuptim.
Si ju duket Shehi si trajner, me të cilin keni qenë shok ekipi?
Shehi është një trajner i ri, ashtu sikurse edhe Shkëmbi. Të dy janë duke bërë mirë. Shehi, që kur ishte akoma në aktivitet si futbollist, e kishte të mishëruar stofin e trajnerit, pasi gjithmonë ka qenë krah për të gjithë trajnerët. Sigurisht që është komplet tjetër gjë nga të qenit lojtar, por kam besim se Shehi do të jetë një nga trajnerët e mirë në qarkullim.
Po Mema?
Memën e kam pasur zv.trajner te Tirana dhe mund të them të njëjtat fjale si për Shehin, por avantazhi i Memës është që ka disi më shumë eksperiencë në stol.
Çfarë avantazhesh kanë skuadrat ndaj njëra-tjetrës në këtë ndeshje?
Avantazhe nuk është se shikoj shumë në këtë ndeshje, pasi të dyja skuadrat kanë problemet e tyre, por ajo që mund të them është që skuadra që do të jetë më e saktë dhe më e qetë në këtë 90-minutësh, do të marrë rezultat pozitiv.
Ku i sheh këto dy skuadra në fund të sezonit?
Për sa i përket pyetjes tuaj, mendoj që Tirana duhet të tentojë për fitimin e Kupës, ndërsa Skënderbeun e shikoj larg realizimit te objektivave të vendosura në fillim të sezonit.
Cilin ekip voton Erbim Fagu për titullin kampion?
Është akoma herët për të thënë se kusht mund të jetë fitues i kampionatit. Do të kisha dëshirë që Teuta të dilte kampione, pasi ka tentuar disa herë, por nuk ia ka arritur qëllimit. Por do të jetë shumë e vështirë me këtë Partizan, që është vërtet i fortë dhe ka më shumë stabilitet se skuadrat e tjera.
