Shehi ndan formacionin, pak ndryshime ndaj Tiranës. Numri një i pankinës korçare ka vendosur që ndaj Tiranës të rikthejë në formacion kapitenin Marko Radas, i cili do të luajë në krahun e djathtë të mbrojtjes. Veç Lulajt dhe Bregut, tashmë Orges Shehi duhet të bëjë mirë llogaritë edhe me mungesën e Vangjelit.
Në kushtet kur ekipit i mungon një mbrojtës krahu, atëherë pritet që Shehi të ruajë sërish dyshen e mbrojtjes të formuar nga Sambou dhe Pëllumbi për të spostuar Radasin në krahun e djathtë dhe Abazin në të majtë. Me dy lojtarë të huaj në mbrojtje, bardhekuqtë duhet të bëjnë kujdes me numrin e të huajve në pjesën tjetër të ekipit ku pritet që të jenë në formacionin e bardhekuqve Dita, Taipi dhe Pervan në mesin e fushës me Muzakën, Gripshin dhe Krasniqin në sulm.
Kjo duket si alternativa më e mundshme për Skënderbeun në këtë pikë kur mungesa e Vangjelit është humbja më e madhe në një ndeshje kaq delikate. Për këtë arsye, trajneri duket tashmë i vendosur të hedhë në fushë pak a shumë të njëjtin ekip që luajti me Laçin me të vetmin ndryshim të detyruar për shkak të mungesave dhe lojtarëve të huaj.
