Ardian Mema nuk humb kohë, por formaton 11-shen për takimin me Skënderbeun. Me një mungesë si Erjon Hoxhallari, Ardian Mema duhet të mendojë për formacionin anti-Skënderbeu. Fakt është se mbrojtës të majtë Tirana ka vetëm Ismailgecin, por ai dje nuk ka qenë i grumbulluar me ekipin, pasi po aktivizohet me kombëtaret e moshave. Gjithsesi, edhe nëse do të ishte i gatshëm, Mema do të mendohej dy herë për ta aktivizuar.
Megjithatë, trajneri nuk ka humbur kohë dhe menjëherë ka gjetur zgjidhjen. Albi Doka do të jetë mbrojtësi i majtë i Tiranës. Futbollisti është provuar gjatë gjithë stërvitjes së djeshme majtas në vend të Hoxhallarit. Imami do të qëndrojë në qendër të mbrojtjes. Po kështu dilema ka në mesfushë me njërin prej Dajës dhe Mavejesë, i cili mund të luajë nga minuta e parë. Po kështu edhe sulmi mund të ketë ndryshime, me Kobinën, që ka një shans për të luajtur, por i favorizuar mbetet Grent Halili. Pjesa tjetër e lojtarëve është po ajo e sfidës me Luftëtarin.
STËRVITJA – Stërvitja e djeshme ka qenë me ritëm të ulët, por paçka të gjithave ka pasur një aksident të vogël. Pas një ndërhyrjeje të fortë, Toni Maveje ka lënë stërvitjen. Madje, për të është shqetësuar edhe trajneri Ardian Mema, i cili është bashkuar menjëherë me stafin mjekësor, duke i kërkuar sqarim për shkallën e dëmtimit. Të rinjtë e ekipit, me përjashtim të Dingut, ishin në ekipet kombëtare.
FORMACIONI I MUNDSHËM– Abibi, Kërçiku, Turtulli, Imami, Doka, Karabeci, Maveje (Daja), Hasani, Halili (Kobina), Greca, Ngo.
/Panorama Sport/
