Pas rreth 3 orësh, ka përfunduar protesta e thirrur nga opozita.
Kryetari i Partisë Demokratike Lulzim Basha ka paralajmëruar protesta në të gjithë vendin deri në rrëzimin e Edi Ramës nga drejtimi i qeverisë.
“Shqipëria do ketë një të ardhme, derën e Europës do ta hapim. ky është mesazhi i popullit të bashkuar si asnjëherë më parë. E duam Shqipërinë si gjithë Europa. Bëhuni gati për betejën e radhës në Tiranë, Shkodër, Korçë, Elbasan, anembanë vendit. zoti e bekoftë Shqipërinë, Fitore”, tha Basha nga selia e PD-së.
Fjala e kryetarit të PD-së
“Zonja dhe zotërinj, vëllezër dhe motra, misionarë të shpresës, bashkëkombës kudo që na ndiqni. Opozita parlamentare sot dorëzoi mandatet dhe i vuri kyçin parlamentit të krimit. Prej ditës së sotme, jemi qytetarë të thjeshtë në krahun tuaj, me ju dhe për ju nisëm sot një rrugëtim shprese që s’do ndalet derisa sa destini evropian i këtij vendi të behët realitet. Derisa ta largojmë kryehajdutin dhe qeverinë e tij kriminale, Rama ik! Le ta shpërndajmë këtë energji hyjnore që mund të burojë vetëm nga shpirti i një race fisnike eurpiane siç jemi ne. në çdo cep të Shqipërisë tonë të dashur le të nisin këtë rrugëtim për largimin e Maduros së Europës. Po, miqtë e mi, Shqipëria do të ketë një të ardhme dhe si takon kriminelëve, si takon Niçes, Habilajve dhe Shullazëve, nuk i takon narkotrafikantëve, oligarkëve hajdutë që iu kanë zhvatur xhepat tuaja dhe i kanë hequr bukën fëmijëve tuaja, nuk i takon njeriut që solli këtë të zeze, Edi Ramës dhe bandës së tij hajdute. Do të jetë e ardhmja juaj, e njerëzve të ndershme që duan ti japin fund padrejtësisë dhe do ti japin fund, që duan ti japin fund pandëshkueshmërisë dhe do ti japin fund, që duan ti japin fund parlamentit të krimit nga krimi dhe do ti japin fund dhe së bashku me vullnetin tuaj, me zgjedhje evropiane do të kemi një qeveri të popullit për popullin. Shqipëria do ketë një të ardhme, derën e Europës do ta hapim. ky është mesazhi i popullit të bashkuar si asnjëherë më parë. E duam Shqipërinë si gjithë Europa. Bëhuni gati për betejën e radhës në Tiranë, Shkodër, Korçë, Elbasan, anembanë vendit. zoti e bekoftë Shqipërinë, Fitore!”
