Garda e Republikës ka reaguar për heqjen e truprojave ndaj ish-kryeministrit Sali Berisha. Në një sqarim për mediat, Garda shprehet se vijimi i shërbimit të mbrojtjes nga ana e saj ndaj ish-kryeministrit Sali Berisha, është bërë në bazë të ligjit “për Gardën e Republikës së Shqipërisë”.
Vetë Garda sqaron se ligji parashikon që “Kryeministri i vendit përfiton shërbim ruajtje për një periudhe 3-vjeçare pas përfundimit të detyrës”.
Por, ajo që mbetet e pasqaruar është se pse ndërprerja e këtij shërbimi është bërë pikërisht tani, kur periudha 3-vjeçare që parashikon ligji ka mbaruar 4 vite më parë. Sali Berisha nuk është më kryeministër që nga viti 2013 dhe sipas ligjit, ai duhet të përfitonte mbrojte fizike nga Garda deri në vitin 2016.
Vetë ish-kryeministri e ka quajtur këtë lëvizje një hakmarrje të kreut të qeverisë Edi Rama.
Ndërkohë, dy truprojat të cilët ishin ngarkuar me ruajtjen e sigurisë së ish-kryeministrit Berisha, pasi kanë marrë njoftimin nga Garda se kjo detyre e tyre kishte përfunduar, kanë lënë detyrën si gardistë dhe kanë vijuar ti shërbejnë Berishës në mënyrë private. /BN/
