Deputeti demokrat Ervin Salianji dhe avokati Ledio Braho kanë depozituar në gjykatë kërkesën për moszgjatjen e hetimeve për atë që njihet tashmë si çështja “Babale”.
Padia në gjykatë ka ardhur pas zgjatjes së hetimeve nga prokuroria.
Deputeti Salianji në një prononcim për mediat tha se çështja po hetohet prej 9 muajsh, gazetari që denoncoi këtë trafik është nën hetim, ndërsa prokuroria mbylli hetimet për ish-ministrin e Brendshëm, Sajmir Tahiri, që akuzohej për trafikun e drogës me Habilajt.
Duke e cilësuar prokurorinë si tërësisht politike, Salianji tha se është i njëjti prokuror që nuk ka guxuar të marrë mostrate e zërit të vëllait të Fatmir Xhafajt.
Salianji theksoi se zgjatja e hetimeve bëhet thjesht për të mbajtur një tymnajë.
“Do vazhdojmë të denoncojmë aferat e qeverisë dhe kjo është arsyeja pse ne kemi vendosur të dorëzojmë qytetarët.
Nuk e di se çfarë ka kjo çështje që të hetohet për 9 muaj. Gazetari që denoncoi këtë trafik, ku ishte i përfshirë vëllai i ish-ministrit Fatmir Xhafaj, është nën hetim, ndërsa hetimet për Sajmir Tahirin, ish-ministrin e Brendshëm të akuzuar për drogën e Habilajve, janë mbyllur”, tha Salianji.
Ndërsa avokati Ledio Braho theksoi se pretendimet tona ishin të qarta, ka të bëjë me pranimin e ankimit tonë për moszgjatjen e afateve të hetimit sepse e para prokuroria nuk ka arsyetuar asnjë veprim që do të kryejë, edhe sot në seancë nuk kishin asnjë ide në lidhje me veprimet që do të kryejnë.
“Thjesht kërkojë të zvarrisin procesin duke ripyetur disa herë po të njëjtin person në hetim siç është Fredi Alizoti që në çdo rast ndryshon deklaratat. Por kjo nuk mund të jetë shkak që të zgjatet hetimi dhe për persona të tjerë në hetim si deputeti Salianji dhe gazetari Olldashi. Po ashtu prokuroria fajëson vetë sistemin se dosja është transferuar nga njëra prokurori në tjetrën. Për çështje administrative thonë kemi qenë të pamundur për të kryer veprimet.
Afatet hetimore përfundojnë në muajin prill por gjithësesi gjykata do të shprehet me vendim ditën e hënë në lidhje me ankimin që kemi bërë dhe shpresojmë që gjykata të pranojë ankesën.Pretendimet e prokurorisë kanë të bëjnë vetëm me ripyetjen e personit në hetim, Fredi Alizoti. Ai është me masë sigurie “arrest me burg” kështu që mund të ishte pyetur gjatë gjithë kësaj periudhe sa herë të kishin dëshirë prokurorët por si duket është çështja vetëm për të zvarritur procesin”, theksoi avokati.
