Danilo Alvesh përfundon në Kazakistan. I larguar prej kohësh nga Vlora, sulmuesi ka ndërprerë pushimet për t’iu rikthyer futbollit.
Edhe pse në Vlorë e prisnin, ai ka vendosur që të firmosë në kampionatin kazak. Braziliani ka dalë në stërvitje me Okzhetpes, pasi ka kërkuar prishje të kontratës me Flamurtarin për shkak të mosshlyerjes së detyrimeve financiare.
Kampionati në Kazakistan nis në muajin mars dhe Alvesh ka pasur të gjithë kohën e nevojshme për të vendosur. Kujtojmë se ai gjatë merkatos së verës firmosi edhe me klubin turk të Afjet Afionsporit, por u largua shpejt, me justifikimin se djali i tij nuk po përshtatej me klimën dhe se turqit e kishin ngujuar në një hotel. Pas “divorcit” me turqit, braziliani u rikthye te kuqezinjtë. Por kjo aventurë nuk zgjati shumë, pasi iku pa njoftuar.
IDRIZI
I menjëhershëm ka qenë reagimi i Sinan Idrizit pas prezantimit të Danilo Alvesh te skuadra e Okzhetpes në Kazakistan. Administratori tha se sulmuesi ka shkuar me mirëkuptim në klubin e ri dhe se Flamurtari nga kjo lëvizje do të përfitojë financiarisht. “Fituam ca parà dhe kaq. Bëmë një kontratë xhentëlmenësh. Do të kemi një njoftim tjetër. Ai ka firmosur dhe i detyrohet edhe klubit ca para. Unë pres Enzon (djali Danilos) pas tre muajsh. Do mërzitet Enzo nga koha në Kazakistan dhe do vijë në Vlorë.
Të paktën Danilo nuk shkoi në Kazakistanin fals, shkoi në Kazakistan real. Patëm një bashkëpunim me klubin e Kazakistanit. Ka pasur edhe një klub nga Koreja që interesohej për Alvesh, na njoftoi avokati i tij. Ne e kemi lënë të lirë, i kemi thënë që kontratat tona me klubin janë këto. Do të doja që Alvesh të qëndronte në Vlorë. E kemi lënë që pas tre muajve do të vijë prapë te ne (qesh). Sa të ngrohet koha në Kazakistan do vijë në Vlorë. Por po erdhi në Vlorë, do ta ketë shumë të vështirë konkurrencën te Flamurtari me këta djemtë e rinj që po aktivizohen. Ka rivalitet shumë të madh tani te Flamurtari”, tha fillimisht numri një i klubit, duke “thumbuar” tërthorazi edhe Bushiçin./Boldnews.al/
