Komisioni i Pavarur i Kualifikimit ka nisur sot verifikimin për Drejtuesin e Prokurorisë së Apelit të Tiranës, Dritan Peka.
Për Pekën hetimi është shtrirë në tre kriteret e vetingut, që nga rivlerësimi për pasurinë, aftësitë profesionale dhe pastërtinë e figurës.
Gjatë seancës lidhur me kriterin e pasurisë, ILDKPKI ka dorëzuar një raport me konstatimin se, deklarimi është i saktë dhe në përputhje me ligjin. Nga hetimet rezulton se nuk ka kryer fshehje të pasurisë dhe nuk ka kryer deklarim të rremë.
Por, KPK-ja ka kryer një tjetër hetim të thelluar në lidhje me pasurit. Peka rezulton se është pronari i një apartamenti, 94.6 metra katrore në Tiranë, të cilin e ka blerë për 49 mijë e 440 dollarë amerikanë. Po ashtu, ai ka deklaruar se ka në pronësi një apartament 59 metra katrorë në Orikum, Vlorë, blerë për 20 mijë euro dhe një apartament 71 metra katrorë në Tiranë, pjesë takuese 25%, 10 mijë e 47 lekë.
Në pronësinë e prokurorit është dhe një automjet blerë për 980 mijë lekë. “Në lidhje me apartamentin 94.6 metra katrorë, është deklaruar se është blerë nga një kredi dhe të ardhura nga paga. Për këtë apartament, është konstatuar se ka mospërputhje mes dy mandateve të pagesave dhe datës së marrjes së kredisë prej 28 mijë euro. Nuk rezulton që subjekti të ketë pasur burim tjetër financiar për të paguar dy këstet. Ka mospërputhje deklarimesh midis subjektit dhe shoqërisë, për datat e pagesave. Në lidhje me këto gjetje, subjekti ka dhënë shpjegime. Apartament prej 59 metra katrorë në Orikum, blerë më 2011, me kredi dhe të ardhura nga paga. Për këtë pasuri rezulton se më parë ka qenë e lidhur një kontratë me çmim 20 mijë euro dhe kjo shumë ishte likuiduar. Ndërkohë, subjekti ka marrë edhe një kredi të butë prej 5 milionë lekësh”, u bë e ditur gjatë seancës së Pekës.
Kërkesa
Ndërkohë gjatë seancës u referua se bashkëshortja e subjektit i ka bërë kërkesë Kryeministrit për trajtimin me kredi të butë, për pajisjen me shtëpi të funksionareve të gjyqësorit. Në kohën e paraqitjes së kërkesës dhe marrjes së kredisë, subjekti dhe bashkëshortja kishin në pronësi dy pasuri.
Gjatë seancës u arrit në konkluzicionin se “nga hetimi ka rezultuar se kredia e butë duket se është marrë në mospërmbushje të kritereve të kërkuara. Shuma e marrë nëpërmjet kredisë, nuk është përdorur për qëllimin e paracaktuar në kontratën në fjalë. Ajo është përdorur për të blerë një banesë jashtë Tiranës dhe arredimin e një banese. Lindin dyshime për një fiktivitet kontraktor. Për makinën, rezulton se është blerë në Gjermani, për 14 mijë euro nga një tjetër person, S.M.. ky i fundit ka paguar edhe shpenzimet në doganë. Pra nga dokumentacioni, rezulton se vetëm pak ditë pas blerjes për afro 2 milionë lekë, është shitur te subjekti për 980 mijë lekë. Sipas subjektit, kjo diferencë kishte të bënte me problemet e makinës. Pretendimi i subjektit mbështet edhe nga personi S.M., i cili ka deklaruar se mjeti është blerë i prishur dhe për këtë e ka shitur në atë vlerë. Rezulton se, ka mospërputhje mes deklarimeve të subjektit dhe shtetasit S.M për shifrën, kohën dhe mënyrës së pagesës. Mungon dokumenti provues për pagimin e shumës për këtë makinë. Ka dyshime për fiktivitet për shit blerjen e kësaj veture Nga analiza financiare, rezulton se subjekti ka pasur mungesë financiare për të kryer shpenzimet dhe kursimet e deklaruara. Në lidhje me bilancet negative për 2005, 2006, 2009, subjekti ka dhënë shpjegime që di të vlerësohen nga komisioni”.
Pastërtia figurës
Për pastërtinë e figurës, DSIK ka konstatuar përshtatshmërinë për vazhdimin e detyrës, nuk ka informacione dhe indicie, që subjekti ka kontakte me persona të përfshirë në krimin e organizuar.
Për aftësitë profesional, sipas raportit të Prokurorisë së Përgjithshme, rezulton se, ndaj Pekës është paraqitur një ankesë nga 3 shtetas për faktin se prokurori më cilësinë e drejtuesit, nuk ka ushtruar rekurs në Gjykatën e Lartë për një çështje. Nga ana e prokurorit në Prokurorinë e Përgjithshme që ka marrë ankesën, është bërë një memo drejtuar kryeprokurorit ku konstatonte se prokurori nuk ka vepruar në përputhje me ligjin.
Nga analiza e kryer nuk janë konstatuar problematika të tjera nga ana e Prokurorisë së Përgjithshme.
KPK ka kryer një tjetër hetim për kriterin profesional dhe konkretisht për 4 denoncime. Një zonjë denoncon për mungesë të aftësive profesionale subjektin, për mos ushtrim të rekursit. Komisioni ka hetuar dosjen në fjalë, duke konstatuar se në aktivitetin e tij si drejtues janë gjetur shkelje. Subjekti nuk ka ushtruar rekures për disa çështje. Denoncimi tjetër ka të bëjë me dyshimet se ka lidhje për përfshirje në krimin e organizuar, por nga hetimi ka rezultuar se nuk ka indicie për të qenë e vërtet.
Denoncimi tjetër, ka të bëjë me dyshimet për korrupsion. Denoncuesi pretendon se subjekti së bashku me gjyqtar, kanë kryer korrupsion në lidhje me një dosje. Komisioni ka hetuar dosjen, por nuk janë konstatuar indice për korrupsion apo të shpërdorimit të detyrës. Denoncimi i katërt është paraqitur pranë ONM, ku është pretenduar se drejtuesi i prokurorisë së apelit kishte shkelur detyrën, me emërimin e një specialisti në kundërshtim të kritereve të punës.
PANORAMA
