Partia Drejtësi për Integrim dhe Unitet, i është përgjigjur pozitivisht thirrjes së bërë nga kreu i demokratëve Lulzim Basha për djegien e mandateve.
Me anë të një reagimi në rrjete sociale, PDIU thekson se mbështet vendimin e PD-së për djegien e mandateve, pasi kjo është e vetmja zgjidhje që mbetet për të shpëtuar vendin.
Ja reagimi i PDIU:
PDIU mbështet vendimin e PD-së për ti dhënë zgjidhje politike vendit, si i vetmi instrument që politika e përgjegjshme ka për të zgjidhur krizën shumëdimensionale që sot ka kapluar vendin, krizë politike, ekonomike, sociale dhe krizë përfaqësimi, nëpërmjet zgjedhjeve të parakohëshme dhe një qeverie tranzitore, që do të garantojë që shqiptarët të votojnë dhe të zgjedhin për herë të parë të lirë.
Vlerësojmë propozimin e z. Basha për grupin parlamentar të PD-së, që para zërit të qytetarëve dhe nevojës së vendit për zgjidhje politike, nuk vuri status quo(-në) e një parlamenti ilegjitim, por bëri fakt zgjidhjen politike që kjo mazhorancë po e refuzon me arrogancë. Përfaqësuesit e Rilindjes vazhdojnë të lexojnë si pushtetarë e jo si shërbëtorë të shtetit qindra- mijëra qytetarë që dje dolën për një Shqipëri me demokraci funksionale, shtet ligjor dhe një jetë më të mirë e më me dinjitet.
