Nga Boldnews.al
Zona e ujit të Ftohtë në Vlorë u kthye në rrëke gjaku me dy jetë të humbura dhe një tjetër të plagosur. Policia ende nuk ka rënë në gjurmët e autorëve, por duke i shkuar pas tymit e flakës, deri tani ka gjetur makinën e djegur që dyshohet se është e atentatorëve. Viktimë mbetën Orest Rexho dhe Arjan Hasani, gjithashtu plagë mori edhe 42-vjeçarit Armando Sulejmani, që ka dyshime se ishte objektiv i sulmit me armë.
Përtej ngjarjeve mirëfilltas kronike me “personazhe të fortë”, që në mungesë të strukturave të shtetit e bëjnë vetë ligjin e tyre të rrugës, ka edhe qytetarë të pasigurt, që detyrohen të dëgjojnë kryeministrin që të shprehet se kokat e krimit të organizuar janë fshehur ose në burg. Gjithashtu lëshoi edhe deklaratën e papërgjegjshme se ishte i lumtur kur “të fortët” hanë kokat e njëri-tjetrit.
“Ku janë kokat e krimit të organizuar? Sot janë fshehur, ose janë futur në burg ose janë në rradhë për tu futur brenda”, tha kryeministri dy muaj më parë. “Këta që hanë kokën e njëri-tjetrit, ta dish që sa herë hanë kokën e njëri-tjetrin, nuk ndjej asgjë tjetër veçse një frymëmarrje të thellë, dhe them hënkshin kokat e njëri-tjetrit.
Marr frymë thellë… Le të vrasin njëri-tjetrin, janë të lutur ta bëjnë. Këta të fortët që bëjnë të fortin nëpër qytete do zhduken, do e mendojnë mirë kur të dalin nga shtëpia”, deklaroi Rama.
Dhe sot, ndoshta nga të “fortët” ikën edhe dy kokë… Kjo është Vlora që sot po mbjell terror tek qytetarët e pasigurtë. Kjo është Vlora që dje kryeministri e mbushi me mitingdashës dhe sot e zbrazi edhe nga ndonjë turist, pas krismave të gjata të armëve dhe vrasjes së dy njerëzve, qofshin ata me të shkuar kriminale.
Si për ironi, vetëm një ditë pasi Rama mbushin sheshin e Flamurit me militantë partie e nëpunës të administratës, Vlora rikthehet e sigurt në pasigurinë e saj. Është qyteti bregdetar që mban rekord të të rinjve të zhdukur.
Është vendi ku rrëmbehen të rinj në mes të ditës. Por kjo pjesë është Shqipëria që Rama nuk e sheh, për të ekziston vetëm një Vlorë e Shqipëri imagjinare, si ajo e djeshmja me antimitingun e administratës dhe idhtarëve të Rilindjes.
