“Kujdes, mund të përfundoni si Skënderbeu, të dënuar me 10 vite përjashtim nga UEFA për trukime”.
Ky është mesazhi i qartë që po marrin të gjithë futbollistët e klubeve të Serisë A këto muaj, si pjesë e një fushate sensibilizimi që organizohet nga Liga e Futbollit në Itali.
Edhe pse nuk ka një vendim përfundimtar nga KAS i Lozanës për dënimin e korçarëve, emri i tyre po përdoret si shembulli që nuk duhet ndjekur në futbollin botëror dhe atë e kanë dëgjuar yjet më të mëdhenj të Serisë A, por edhe futbollistët shqiptarë që luajnë në klubet kryesore italiane.
Pikërisht një prej këtyre futbollistëve ka konrmuar për VIP Sport se në aktivitetin i cili quhet “Integrity Tour” dhe organizohet nga Liga Italiane në bashkëpunim me kompaninë “Sportradar:, e cila përgatit raportet e UEFA-s, përfaqësues të kompanisë në fjalë u japin këshilla lojtarëve duke përdorur emrin e klubit korçar. Lojtarët këshillohen që të mos bien pre e ofertave për trukime ndeshjesh.
Ata u është treguar futbollistët rrezikojnë seriozisht karrierën e tyre, ashtu si edhe klubet dhe për ilustruar situatën e klubeve është përdorur pikërisht shembulli i Skënderbeut.
“Trukimet sjellin pasoja. Keni rastin e Skënderbeut në Shqipëri. Fillimisht u dënua me një vit përjashtim nga Liga e Kampioneve, e më pas, kur u kryen hetime më të hollësishme, u dënua me 10 vite pezullim nga aktivitetet ndërkombëtare”, janë fjalët e përfaqësuesve të “Sportradar” që përsëriten në çdo mbledhje me futbollistët e klubeve të Serisë A.
Ky tur deri tani ka përshkuar pjesën më të madhe të klubeve italiane si Inter, Juventus, Parma, Bolonja, Roma, Lacio, Atalanta apo Fiorentina, kudo me të njëjtën përmbajtje e me klubin korçar që trumbetohet shembulli i trukimeve.
Një situatë që natyrshëm njollos imazhin e futbollit shqiptar e gjithashtu bën të ndjehen keq futbollistët shqiptarë të cilët luajnë përtej Adriatikut. Sigurisht edhe një situatë e papranueshme për sa kohë që nuk ka dalë vendimi përfundimtar i KAS në Lozanë.
Skënderbeu është ankuar shpesh se “Sportradar” përdorte çështjen e korçarëve në seminare të ndryshme ndërkombëtare për të ilustruar punën që bënte, duke e cilësuar si shkelje të parimit të prezumimit të pafajësisë.
Me trumbetimin që “Sportradar” i bën dënimit të skuadrës shqiptare edhe në mbledhjet në klubet e elitës së futbollit evropian, sigurisht që te korçarët do të shtohen pakënaqësitë për mënyrën se si kompania që bashkëpunon me UEFA-n po e bën fakt të kryer dënimin përfundimtar të klubit, pa pritur verdiktin që del nga Lozana.
