Nga Boldnews.al
Policia pritet të nisë procedime penale ndaj pjesëtarëve të opozitës, që kanë organizuar protestën.
Pas mbylljes së protestës, një grup hetimor ka mbërritur para kryeministrisë. Burime thanë se policia po mbledh prova në vendngjarje dhe informacione nga videot e publikuara në media, për të proceduar penalisht protestuesit. Me gjasë, akuzat që pritet të ngrihen janë për dhunë dhe shkelje të ligjit të tubimeve.
Përmes këqyrjeve të pamjeve filmime pritet të identifikohen protestuesit qe kane përdorur dhunë. Burime thanë se priten edhe procedime penale edhe për ndaj organizatoreve të protestës, të cilët janë zyrtarë të opozitës.
Pritet edhe një takim mes drejtuesve të policisë dhe prokurorisë lidhur me protestën.
Ndërkohë, nga opozita është artikuluar se ka pasur një plan nga policia për ta shtyrë protestën drejt akteve të dhunshme.
“Patë një hapje të menjëhershme dhe të çuditshme të gardhit të oficerëve të policisë që mbronin perimetrin e kryeministrisë. Kjo është qartësisht pjesë e një plani për të provokuar futjen e protestuesve në selinë e Kryeministrisë, sepse në asnjë rast policia dhe gardhi policor, edhe kur kanë presion shumë më të madh, nuk hapet në këtë mënyrë. Pra ka patur një skenar të mirëmenduar madje të paralajmëruar nga Edi Rama për të çuar në dhunë dhe konfrontim”, tha Basha.
