Teuta-Kukësi nuk është vetëm një përballje direkte mes vendit të dytë dhe të tretë, por më shumë se kaq. Ky 90-minutësh nuk luhet për një rokadë të thjeshtë, por mbi të gjitha për… titullin. Duke marrë parasysh rrethanat dhe mbi të gjitha shkëputjen e Partizanit me 8 pikë, takimi që do të startojë sot në orën 18:00 në “Niko Dovana” mund të vendosë shanset e fundit për titullin kampion. Teuta në fakt ka qenë më e frenuar dhe kurrë nuk e ka shpalosur hapur si objektiv, dhe si të thuash është më e lehtësuar nga ky lloj presioni. Ndërsa për Kukësin mund të ishte edhe më dramatike.
Një humbje e secilës në Durrës dhe një fitore e mundshme e Partizanit në Laç do i nxirrte praktikisht nga “lufta” për kreun. Një barazim ndoshta nuk do të ishte fatalist si rezultat për asnjë nga ekipet dhe ndoshta mund të kapërdihej, por humbja është kategorikisht e ndaluar. Teutës nuk do i mbetej tjetër, veçse të kujdesej për një vend në zonën “Euro”, ndërsa Kukësit do i prishte edhe më shumë balancat dhe sidomos kur njihen ambiciet e presidentit Safet Gjici.
MERKATO – Për ironi të fatit, sot do të ndeshen dy skuadra që në letër kanë bërë merkaton më të mirë. Gjatë janarit, Kukësi mori emra Vasil Shkurtaj dhe Eduart Rroca, ndërsa Teuta afroi Renato Arapin, Tomislav Bushiçin e Armando Vajushin. Por, përtej pompozitet, asnjë nga afrimet e reja nuk po gjen dot ekuilibrat e duhura dhe nuk kanë rezultuar efikas.
AVANTAZHI – Nëse Armando Cungu u ankua javën e kaluar se luajti pas Partizanit dhe ky fakt i vuri ndjeshëm në presion, tashmë ka shansin që të vërtetojë se ka pasur realisht të drejtë dhe t’ua kalojë “stafetën” kryesuesve. Nëse verilindorët do të siguronin një trepikësh sot, atëherë në trysni do të viheshin “demat”, që të dielën do të luajnë në Laç./Boldnews.al/
