Nga sezoni fantas tik i mbyllur me Sibalan në Kroaci dhe transferimi i bujshëm tek Osijek, e deri te huazimi në Korçë. Kroati Marko Pervan rrëfen karrierën e tij dhe ardhjen në vendin tonë.
Sulmuesi i Skënderbeut, në një intervistë ekskluzive për “Panorama Sport” tregon kulmin e karrierës së tij, vështirësitë në futbollin kroat dhe zgjedhjen për të pranuar kampionët në fuqi në vendin tonë. Mesfushori i ri i Skënderbeut tregon peripecitë e së kaluarës, por edhe “bashkëjetesën” me kroatin tjetër të korçarëve, Marko Radas.
Pervan tregon se kapiteni i ka injektuar gjak korçari në vetëm pak kohë qëndrimi në Korçë. Gjithashtu, ai flet për lojtarët që ndjek dhe i ka idhuj, apo edhe për ëndrrën që ka dhe premtimin e madh që i ka bërë kapiteni aktual i bardhekuqve.
Pervan, pas një sezoni fantastik me Sibalan u transferuat tek Osjek. A ishte kjo pika më e lartë e karrierës suaj?
Në anën sportive, po! Mund të them se te Sibala bëra sezonin më të mirë, sidomos vitin e dytë të qëndrimit atje, pasi isha një nga lojtarët kyç të ekipit. Atje rashë në sy të Osijekut që më kërkoi me çdo kusht të më kishte në ekip. Nga ana profesionale ishte hap përpara, por rezultoi një zgjedhje jo fort e mirë më pas.
Në Korçë gjetët një tjetër kroat, Marko Radas. A ju ka folur gjatë kësaj kohë për ekipin?
Po, jam ndier vërtet mirë kur mësova se kapiteni i ekipit është Radas. Ndihem mirë se është kroat si unë, por më “bezdis” disi pasi gjithmonë më flet për Skënderbeun. Është kaq shumë i dashuruar me këtë ekip, saqë më ka injektuar edhe mua gjak bardhekuq në vena.
Më ka treguar thuajse gjithçka nga fillimet e tij këtu e deri tek aventurat në Europa Ligë. Madje, më ka premtuar se nëse qëndroj këtu, do të luaj edhe unë në Champions me këtë fanellë.
Pervan, na fol pak për veten, kush është lojtari, të cilit doni t’i ngjani?
Të them të drejtën, gjithmonë luftoj që të le shenjën time te çdo ekip që shkoj. Por më pëlqen mënyra e lojës së Ivan Rakitiç. Është një nga lojtarët më të mirë të mesfushës për mendimin tim. Pak a shumë, mundohem të jem Rakitiçi i Skënderbeut.
/Panorama Sport/
