Pak ditë më parë, Armand Duka u zgjodh anëtar i Komitetit Ekzekutiv në UEFA dhe në media u fol se ishte ndër të parët që miratoi dënimin që UEFA ka dhënë për Skënderbeun, duke e përjashtuar për 10 vite nga çdo kompeticioni Europian. Megjithatë, presidenti Duka e ka hedhur poshtë këtë lajm që qarkullon prej ditësh.
Në një intervistë për ‘A2 News’, Duka u shpreh se dënimi i Skënderbeut është i paprecedent dhe se vetë ai nuk do të ishte kurrë dakord me një dënim të tillë që e konsideron si një dënim të përjetshëm dhe jo 10-vjeçar.
“Dënimi i Skënderbeut është i paprecedent, nuk ka ndodhur asnjëherë. Nuk do isha dakord me një dënim të tillë, pasi dënimi është i përjetshëm nëse e zbërthen tamam. Mendoj që nuk është rasti më i keq, por është bërë për t’u marrë shembull”, u shpreh Duka.
