Në një ditë të ftohtë dhe me reshje shiu, Skënderbeu dhe Laçi përmes lojës sikur e ngrohin atmosferën për ata pak tifozë të pranishëm në stadiumin e Korçës.
Gjithsesi, mund të themi se kanë qenë më pak se 900 tifozë në shkallët e stadiumit, që mes shiut u munduan që të jenë mbështetje për Skënderbeun në një moment kur ekipi ka më shumë nevojë për përkrahjen e tifozëve. “Panorama Sport” sjell të gjitha pikantet e ndeshjes së djeshme që riktheu Skënderbeun te fitorja pas 3 muajsh.
* Trajneri Orges Shehi, ndryshe nga Besnik Prenga, kishte dalë i papërgatitur për kushtet e motit. Ai qëndroi në shi për një pjesë të mirë të lojës. Në pjesën e dytë trajneri bardhekuq u pa me një xhup të trashë të veshur për t’u mbrojtur nga reshjet e dendura.
* Tifozët në krahun e pankinës së Laçit nuk kanë lënë rast pa ngacmuar trajnerin Prenga, duke i bërë me dije se është koha që ata të humbin këtë ndeshje. “Nuk fitoni dot sot, o Prenga! Ikni shikoni ndeshjen e radhës”, kanë qenë batutat e tifozëve, ndërsa nga ana tjetër në çdo protestë të stolit bardhezi reagonin egër, duke detyruar pjesëtarët e stafit dhe lojtarët që qëndronin në pankinë të uleshin menjëherë.
* Kapiten në fushë, por edhe udhëheqës i ekipit ka qenë si zakonisht Kristi Vangjeli. Korçari vazhdonte që të udhëzonte në çdo lëvizje shokët e skuadrës për t’i këshilluar në pozicionimin e tyre në fushë. Kryesisht Vangjeli u morr me lojtarët e rinj në ekip, nga të cilët kërkonte që të bënin maksimumin në fushë.
* Në një pjesë të madhe të lojës, Shehi ka vijuar të kërkojë shumë nga Dita në mesin e fushës, që hera-herës ndërronte rolet me Pervan.
* Në fund të takimit, britma të mëdha janë dëgjuar nga stoli i korçarëve, por edhe nga dhomat e zhveshjes. Kjo të bën të kuptosh se Skënderbeu ka dashur të nxjerrë të gjithë dufin e vet të mbledhur në të gjitha ndeshjet e humbura radhazi.
* Presidenti Takaj si zakonisht ka qenë në tribunë i shoqëruar nga Arlind Boshku dhe kryebashkiaku Sotiraq Filo, që në fund të takimit kanë dalë të buzëqeshur për faktin se ekipi u rikthye në rezultatet pozitive, por edhe për shkak të lojës së zhvilluar nga korçarët. Kjo ngrohu kreun e klubit, që nuk i kurseu duartrokitjet.
* Nga ana tjetër, edhe drejtuesit e Laçit kanë qenë në pjesën e djathtë të tribunës, duke kërkuar nga ekipi të bënte kthesën pas humbjes ndaj Luftëtarit. Por, një gjë e tillë nuk ndodhi dhe të gjithë u larguan të mërzitur nga Korça, madje të acaruar me lojën e skuadrës. /Panorama Sport/
