Këngëtari i “Threedots”, Bruno lançoi këngën më të re me titull “Zoti t’më vrasë” që sigurisht edhe këtë herë si në shumicën e këngëve të tij teksti dhe muzika mbajnë emrin e kantautorit Flori Mumajesi. Por për habinë e të gjithve, Flori ka pasur në dorë edhe regjinë e klipit të “Zoti t’më vrasë”, siç mund ta shikoni të shkruar tek titrat në Youtube.
Thonë se kush ka “dell artisti” arrin ta shpërndajë talentin në të gjitha fushat e artit e megjithatë, ne mendojmë se veç talentit të pazbuluar deri më tani si regjisor, Flori ka dhe një nuhatje vërtetë gjeniale. Prej kohësh, fansat shprehen se Bruno ngjan vërtetë si aktor, sidomos i telenovelave turke ndaj dhe në këtë klip, Flori ka vendosur të bëjë një mini-film me fund të dhimbshëm ku shtjellohet një dashuri e madhe por e pamundur ku protagonist në rolin kryesor është sigurisht Bruno.
Skena të shpejta, emocione të forta dhe dinamikë që të përfshin – Flori na e ka gjetur edhe nëpërmjet pamjeve pikën e dobët: ne vendosim pranë zemrës, sidomos këngët që i bëjmë lehtësisht tonat, ato që na përkasin e janë pranë të vërtetës ama me disa elemente “filmi” për ta dramatizuar më shumë.
Tashmë që Flori Mumajesi ia doli me sukses edhe kësaj fushe, regjisë së klipit, duke njohur idetë e tij inovatore dhe dëshirën për të sjellë gjithmonë në tregun shqiptar dimensione që mungojnë, jemi të sigurtë se ky klip nuk ishte thjesht eksperiment por fillimi i një rruge të re që me siguri do ta çojë edhe më lart figurën e kantautorit.
