Një efektiv i Policisë është shoqëruar nga kolegët e tij dhe po merret në pyetje, pasi dyshohet se ka ngacmuar një studente në ambientet e Fakultetit Juridik në qytetin e Shkodrës, ku vajza studion.
Efektivi 25-vjeçar i Forcave të Ndërhyrjes së Shpejtë, ka deklaruar gjatë marrjes në pyetje se e pëlqen studentet dhe se ja ka shprehur vazhdimisht ndjenjat e tij. Por ditën e djeshme, një incident është shënuar në auditoret e Juridikut, ku efektivi ka shkuar të bisedojë me studentet. Ai ka hasur në kundërshtinë e saj, dhe sipas deklarimit të tij në polici, efektivi e ka tërhequr me forcë për krahu. Mësohet se kjo situatë ka ngjallur frikë tek studentja, por edhe tek shokët e saj të pranishëm, por nga ana e vajzës nuk ka pasur asnjë denoncim në polici.
Rasti është shënuar ditën e djeshme, por u bë publik sot nga një denoncim i ardhur në profilin e ish-kryeministrit Sali Berisha në Facebook. Pas këtij denoncimi, policia shoqëroi sot efektivin e FNSH-së i cili ka mohuar akuzat për tentativë përdhunimi.
Sipas denoncimit tek Berisha, efektivi kishte tentuar ta përdhunonte vajzën. “Studentet vajza janë shokuar shumë por me ndërhyrjen e djemve, përdhunuesi është mbajtur i mbyllur në banjo derisa ka ardhur policia. Policia dje nuk ka bërë asgjë”.
Ndërkohë sot, në rrjetet sociale të menaxhuara nga disa studentë është publikuar edhe video e shoqërimit nga policia të efektivit të FNSH-së. /Report Tv/
https://www.youtube.com/watch?time_continue=12&v=kmg9ddNlY5M
