I janë dashur vetëm dy ndeshje dhe pak besim nga ana e ekipit që të shpërthejë. Marko Pervan është kthyer direkt në një pikë referimi për Skënderbeun dhe këtë e dëshmoi dje, ndërsa ishte katalizator mes mesfushën dhe sulmin.
Gjatë një deklarate të dhënë për gazetën “Panorama Sport” në fund të 90-minutëshit, kroati deklaron se ka gjetur një ekip për të cilin ia vlen edhe sakrifica. “Jam i lumtur këtu, pasi menjëherë m’u dha mundësia të jem pjesë e rëndësishme e këtij ekipi. Kisha vërtet nevojë për besim dhe këtë e gjeta te Skënderbeu.
Mund të them se është një skuadër që ia vlen të luash dhe të sakrifikosh. Po kalonim një moment të vështirë, e kam kuptuar që në fillim. Por, mendoj se tashmë gjithçka mori fund. Duhet vetëm vazhdimësi dhe jam i bindur se do ta kemi një gjë të tillë”, u shpreh fillimisht 22-vjeçari.
I pyetur në fund për penalltinë e ekzekutuar, numri 30 i bardhekuqve tha: “I falënderoj të gjithë që ma besuan mua 11-metërshin dhe jam gati të jap shpitin për këtë ekip. Radas më ka folur shumë për sukseset e Skënderbeut dhe menjëherë më ka bërë që të dua këtë fanellë”.
