Ndeshja Kukësi-Tirana pati shumë tifozë, të cilët të shumtë në numër kishin bllokuar radhën për të blerë bileta. Vetëm pasi nisi ndeshja, u bë e mundur hyrja e gjithë tifozëve në tribuna, të cilat ishin plot e përplot me tifozë të Tiranës. Mbështetësit e bardhebluve ishin të vendosur në dy tribunat kryesore, ndërsa ata të Kukësit në karshi. Ndërsa Kukësi kishte dhe disa tifozë që nuk iu mjaftonte stadiumi, por e kanë ndjekur ndeshjen sipër njërit prej pallateve në afërsi të fushës.
Tirana po bënte rezistencë gjatë gjysmës së parë të pjesës së parë e reagimi i tifozëve të Kukësit ishte i natyrshëm ndaj ekipit të tyre. Ata e kishin me Shametin duke iu drejtuar: “O inxhinier, karikoje pak ekipin se po flenë këta sulmuesit”.
Pas shënimit të golit nga ekipi i Tiranës ishte Rexhinaldo që përplaset me Edon Hasanin, e janë tifozët e Kukësit dhe të pranishmit në tribunën VIP që shfryjnë ndaj ish-lojtarit të tyre.
Në fund të ndeshjes në pankinën e Kukësit, por dhe në dhomën e zhveshjeve nuk “pipëtinte miza”, pasi të gjithë mbetën pa fjalë dhe mjaft të vrenjtur. Humbja bëri që mos të kishte as prononcime për mediat nga lojtarët dhe drejtuesit, përveçse trajnerit Cungu.
