Departamenti për Krime të Rënda, në Prokurorinë e Ferizajt ka njoftuar se pas një hetimi të bërë, në bashkëpunim me njësinë antidrogë, kanë sekuestruar 220 kg substancë narkotike të llojit marijuhanë dhe tri automjete.
Radio Europa e Lirë shkruan se substanca narkotike dyshohet se kishte ardhur nga Shqipëria me destinacion final vendet perëndimore. “5 personat e arrestuar dyshohet se këtë sasi të marihuanës kanë pasur për qëllim ta transportojnë jashtë shtetit të Kosovës”, thuhet në njoftim.
Në komunikatë theksohet se një pjesë e grupit janë në arrati dhe se hetimet vazhdojnë. Pesë të arrestuarve u është caktuar masa e ndalimit për 48 orë.
