Nga Boldnews.al
Kontrolli i Lartë i Shtetit ka zbuluar një seri shkeljesh ligjore në Autoritetin e Aviacionit Civil (ACC), të cilat i kanë sjellë shtetit një dëm në rreth 1.5 milionë euro.
“Boldnews.al” ka siguruar një raport të institucionit më të lartë auditues të vendit, në të cilin janë renditur abuzime me ligjin. Sipas Kontrollit të Lartë të Shtetit, përgjegjës për dëmin financiar në vlerë totale mbi 2 miliardë lekë janë: Drejtuesi aktual i Autoritetit të Aviacionit Civil Krislen Keri, si edhe paraardhësit e tij, Lilika Radovicka e Flamur Çelaj, si edhe drejtori i financës në këtë institucion, Feim Godo.
Kontrolli i Lartë i Shtetit ka konstatuar se drejtuesit e Aviacionit Civil, në kundërshtim me përcaktimet ligjore, nuk kanë kthyer në buxhetin e shtetit fitimet e nxjerra gjatë aktivitetit të tyre. Por, përkundrazi, sipas KLSH, shumat që duhet të kalonin në depozitat e financave publike, janë mbajtur nga autoriteti në llogari bankare të nivelit të dytë.
Ligji për Aviacionin Civil parashikon që ky institucion financohet nga të ardhurat e veta. Por, gjithashtu, përcaktohet se pjesa e fitimit që mbeten në fund të vitit përdoren për të plotësuar detyrimet deri në 3 muajt e vitit të ardhshëm kalendarik. Diferenca që mbetet arkëtohet në llogarinë e Buxhetit të Shtetit.
Pikërisht, ky detyrim nuk është zbatuar dhe Kontrolli i Lartë i Shtetit ka arritur në konkluzionin se totali prej 1.5 milionë euro nuk është depozituar për llogarinë e Buxhetit të Shtetit, por është mbajtur në mënyrë abuzive në llogaritë bankare të Autoritetit Civil.
Më konkretisht, në raportin e KLSH-së thuhet: “…Nga ana e strukturave drejtuese të Autoritetit të Aviacionit Civil nuk janë marrë masat për kalimin e këtyre fondeve (fitimit të mbetur pas shlyerjes së detyrimeve) për llogari të Buxhetit të Shtetit…Për pasojë, vlera 102.368.000 lekë, që përbën vlerën e fitimit që nuk është derdhur në llogarinë e Buxhetit të Shtetit për vitet 2016 dhe 2017, përbën të ardhura të munguar, me pasojë dëm ekonomik për Buxhetin e Shtetit”.
Gjithashtu, gjatë këtij Auditi, Kontrolli i Lartë i Shtetit konstaton se edhe fitimet e krijuara para vitit 2016, sërish në kundërshtim me ligjin, nuk janë depozituar në llogarinë e Buxhetit të Shtetit, por janë mbajtur gjendje në llogaritë bankare të Autoritetit Civil, përkundër rekomandimeve të KLSH-së në një raport të mëparshëm.
Më konkretisht, Kontrolli i Lartë i Shtetit shkruan në raportin e tij se konsiderohet dëm ekonomik “..Gjithashtu edhe vlera 108.990.000 lekë, e cila përbëhet nga fitimi i akumuluar nga periudha para vitit 2016, evidentuar kjo edhe në raportet e mëparshme të KLSH, por që nuk është derdhur në llogarinë e Buxhetit të Shtetit…”.
Pra, sipas konstatimeve të KLSH, drejtuesit e Autoritetit të Aviacionit Civil, për të paktën prej vitit 2016, nuk kanë arkëtuar në llogaritë e Buxhetit të Shtetit, siç i detyron ligji, shumën në një total prej rreth 1.5 milionë euro.
“Për sa më sipër – shkruhet në raportin e KLSH- mbajnë përgjegjësi z. Krislen Keri, Drejtor Ekzekutiv i ACC për periudhën 10.11.2017 e në vijim; znj. Lilika Radovicka, me detyrë Drejtore Ekzekutive e ACC për periudhën 20.01.2017-10.11.2017; z. Flamur Çelaj, me detyrë Drejtor Ekzekutiv i ACC për periudhën 04.11.2016-20.01.2017; si edhe z. Feim Godo, me detyrë drejtor i drejtorisë ekonomike për periudhën objekt auditimi”.
