Të martën në mesditë Besëlidhja u nis drejt Korçës, aty ku sot do të zhvillojë ndeshjen e kthimit për llogari të turit të dytë të edicionit të Kupës së Shqipërisë. Ndeshjen e parë në shtëpi lezhjanët e humbën me shifrat 1-2, ndonëse kaluan të parët në avantazh. Edhe pse fraksioni i parë u mbyll me shifrat e barabarta 1-1, në pjesën e dytë Skënderbeu ia doli që të kalonte në epërsi.
Te Besëlidhja janë të ndërgjegjshëm se është shumë e vështirë që të përmbyset humbja në shtëpi, pasi lezhjanëve u duhet minimalisht një fitore e pastër me shifrat 2-0. Gjithsesi, lezhjanët nuk e kam humbur shpresën te një kualifikim i mundshëm dhe këtë e mendojnë të gjithë, përfshi trajnerin Vladimir Gjoni, i cili e konfirmoi gjatë një bisede për “Panorama Sport”. Me sa duket, te Besëlidhja frymëzohen jo pak nga surpriza që bënë dy edicione më parë, ku shkuan deri në gjysmëfinale.
“Ndonëse objektivat tanë janë në kampionat, edhe Kupën nuk do ta lëmë pas dore, pavarësisht se përballë do të kemi kampionët në fuqi dhe sfidën e parë në shtëpi e humbëm me shifrat 1-2. Në sport në përgjithësi, futboll në veçanti, dhe në shumë fusha të tjera, nuk duhen humbur shpresat, pasi gjithçka vendoset ndoshta në çastet e fundit.
Duke iu referuar kësaj që e kam edhe nga eksperienca, ne jemi nisur drejt Korçës të përgatitur maksimalisht, pasi e kemi vlerësuar ashtu siç duhet kundërshtarin. Duke e ditur se humbja që pësuam në shtëpi ishte më shumë aksidentale sesa e diktuar nga loja e kundërshtarit, ende shpresojmë në një kualifikim të mundshëm.
Në Korçë do të luftojmë për një gjë të tillë. Besëlidhja ka dhënë prova se luan edhe më mirë në transfertë dhe për më tepër ndaj skuadrave të mëdha. Këtë e ka treguar ndër vite, madje edhe në këtë kampionat ndaj Vllaznisë, kështu që shpresojmë”, deklaroi dje për gazetën trajneri i Besëlidhjes. /Panorama Sport/
