Prej disa javësh studentë të Fakultetit të Shkencave Sociale protestojnë, ndërsa ata kanë marrë mbështetjen edhe të pedagogëve që kanë nisur grevën.
Por kundër tyre duket se është rreshtuar dekani Edmond Rapti. Duket se ky qëndrim i dekanit ka acaruar raportet me studentët që kanë zgjedhur një mënyrë krejt të veçantë për të protestuar.
Ata kanë lidhur me fasho makinën luksoze të dekanit, e cila ndodhej e parkuar në oborrin e Fakultetit. Pamjet në video tregojnë sesi dekani me nervozitet shkul fashot, ndërsa ky moment duket se ka kënaqur studentët protestues.
“Dekani merr përsipër të përçojë propagandën e qeverisë duke shpërdoruar fjalën publike në një situatë të tillë të jashtëzakonshme duke bërë diversion.
Ne si studentë që kemi ndihmuar në krijimin e një fryme shprese në fakultet, duke u përpjekur ta rithemelojmë dinjitetshëm domenin publik në arsim së bashku me pedagogët, përveçse të fyer, ndihemi të papërfaqësuar nga fjala dhe pozicionimi i dekanit të Fakultetit të Shkencave Sociale.
Ironisë, dizinformimit dhe gënjeshtrës që vesh pushtetin e fjalës në strukturat drejtuese në universitet, do t’i përgjigjemi gjithnjë me protestë”, thuhet në njoftimin që shoqëron videon nga studentët e Fakultetit të Shkencave Sociale.
