Nga Boldnews.al
“Boldnews.al” raportoi një ditë para dhënies së vendimit nga Komisioni i Vetingut, se Donika Prela do të konfirmohej në detyrë. Në bazë të informacionit, të siguruar në mënyrë ekskluzive, drejtuesja e Prokurorisë për Krime të Rënda do të konfirmohej me votat e Valbona Sanxhaktari dhe Olsi Komici, ndërsa komisioneri i tretë, Roland Ilia, do të deklarohej kundër.
Paraditen e së Martës, “Boldnews.al”, si edhe publiku, mësuan zyrtarisht që Donika Prela u konfirmua me votën unanime të të tre anëtarëve të trupës gjykuese. Ndaj, redaksia jonë e konsideron të nevojshme që t’i kërkoj falje komisionerit Roland Ilia, ish-kandidatit për deputet të G-99 të Erion Veliat, për disa arsye;
1. I kërkojmë “falje” Roland Ilias që besuam se ai, njëlloj si ne, ndante mendimin se mospagimi i taksave në Shqipëri, si kudo në vendet e qytetëruara, është shkelje ligjore;
2. I kërkojmë “falje” Roland Ilias që besuam se ai do të konstatonte se blerja lirë dhe shitja shtrenjë e pasurive të paluajtshme është pastrim i pastër parash;
3. I kërkojmë “falje” Roland Ilias që besuam se do të dilte në konkluzionin se të blesh apartament tek njeriu që ke nën hetim, jo vetëm që është konflikt interesi, por është një pazar i pastër antiligjor;
4. I kërkojmë “falje” Roland Ilias që menduam se ai do të konsideronte shkelje të rëndë faktin e lirimit nga burgu të anëtarit të një bande famëkeqe të Shijakut;
5. I kërkojmë “falje” komisionerit Roland Ilia që besuam se ai do të ngrinte zërin kur konstatoi se si për trafikantin e 1.7 ton kanabis, u ndryshua akuza në “moskallëzim krimi”.
6. I kërkojmë “falje” Roland Ilias që menduam se do të jepte mendimin e tij kundër shkatërrimit të dosjes “Shullazi”.
Por gabuam në shpresën tonë. Gabuam kur besuam se Roland Ilia do të ishte një njeri i lirë dhe nuk do të merrej peng nga politika.
Për dy kolegët e tij, Sanxhaktari dhe Komici, askush nuk kishte asnjë dyshim që ata janë pjesë e partisë në pushtet, pavarësisht se mbajnë mbi vete pozicionin e komisionerit “të pavarur” të kualifikimit.
Drejtuesja e Prokurorisë për Krime të Rënda, Donika Prela, u konfirmua në detyrë nga Komisioni i Pavarur i Kualifikimit, pavarësisht një serie shkeljesh të konstatuar jo vetëm nga institucionet e përfshira në Veting, por edhe nga “Boldnews.al”.
Prela u konfirmua përkundër qëndrimit të Operacionit Ndërkombëtar të Monitorimit, i cili, nëpërmjet vëzhguesit të tij, Theo Jacobs, ngriti pikëpyetje me integritetin professional dhe pasuritë e drejtueses së Krimeve të Rënda.
