Nga Boldnews.al
Për kryebashkiakun Erion Veliaj, ky vit presupozohet të jetë i mbarë… Futi duart në arkën e bashkisë dhe në bashkëpunim edhe me Amabasadën Kineze në Tiranë organizoi festime për Vitin e Ri Kinez. Në traditën aziatike, çdo vit i përket një kafshe të veçantë dhe sipas kalendarit të tyre ky është viti i derrit.
Lali e bëri detyrën me një “derr propagande”, duke u shfaqur edhe si një drejtues lokal vizionar që kujdeset për qytetarët e një shteti tjetër, siç është komuniteti kinez, qoftë edhe në numër të vogël që jeton në Tiranë.
Si për ironi, sot u njoftua një tjetër i vdekur në Sanatoriumin e Tiranës, duke e çuar në tre jetë të humbura brenda katër ditëve dhe dy prej tyre tashmë janë të konfirmuara se ishin prekur nga virusi “AH1N1”, që njihet ndryshe edhe gripi i derrit. Institucionet e shëndetësisë janë ende të tulatura nga kjo situatë dhe nën zë e pranojnë se virusi qarkullon rrezikshëm në Shqipëri.
Tre jetë ikin me dilema të shumta mbi sinptomat, ndërsa në vend i jepet më shumë rëndësi propagandës, dukjes dhe aspak problemit, qoftë edhe kur ajo ka të bëjë me jetën e njerëzve. Si gjithnjë mjeshtri i piarit (PR), ose propagandës së ulët, malinje e me mbrojtje të fortë mediatike është Erion Veliaj.
Në çdo vend normal, pushteti lokal do të ishte interesuar për çdo jetë të humbur, kur bëhet fjalë për dyshimet mbi përhapjen e një virusi. Kryebashkiakët ashtu të heshtur, pa kamera e fotografë, pa facebook apo Twitter do mblidheshin në institucionet e shërbimit, nga çerdhet, të kopshtet, shkollat apo universitetet dhe do interesoheshin për çdo masë të mundshme në shërbim të qytetarëve.
Më shumë se propaganda dhe paratë e hedhura për festimin e Vitit të Ri Kinez, (qoftë edhe ai viti i shansit për Erioni që e lidh me derrin), bashkia duhet të ishte në alarm për virusin vdekjeprurës që po qarkullon. Specialistët e saj, të gjendeshin në terren dhe jo në zyra e skuta të tjera duke bërë gati tenderin e radhës për djegie mbetjesh, apo dhënien e lejeve të ndërtimit për ndonjë “kullë oligarkike”.
Televizionet kryesore i japin rëndësi festimeve të Lali Erit për Vitin e Ri Kinez, për t’i trasmetuar çdo kinezëri që mbërrin nga zyrat e propagandës së bashkisë, ndërsa e kanë të palejuar që të dërgojnë një gazetar dhe pyesë mbi masat e bashkisë që duhet të marrë për çdo rast ku dyshohet se në vend qarkullon një virus, me pasoja të rënda sidomos ndaj të moshuarve dhe fëmijëve. Një thirrje për Lali Erin: “Qytetarët po vdesin nga gripi i derrit, mos hidh para e bëj paradë me festimin e Vitit të Ri Kinez, vitit të derrit…”. Çerdhet, shkollat dhe kopshtet që administrohen nga bashkia janë në rrezik!
