Gjatë ditës së djeshme një vajzë e re është aksidentuar duke rrezikuar seriozisht jetë në zonën e njohur si Liqeni Artificial, në kryeqytet. Vajza ishte duke shëtitur me biçikletë ndërkohë që ka humbur kontrollin dhe ka rënë nga pista e bicikletave.
Kanë qenë pikërisht kalimtarët e rastit ata që i kanë dhënë ndihmën e shpjetë e që më pas kanë lajmëruar edhe ambulancën. Por, si ka mundësi që në një vend ku në lajme publikohet edhe frymëmarrja e zyrtarëve të lartë të shtetit, nuk përmendet një ngjarje e tillë?
Sepse në vendin tonë të vërtetat konsumohen në kafene dhe në biseda mes miqsh pasi pushteti i propagandës nuk ka lënë më asnjë hapësirë për të treguar. Për të treguar aksidente apo incidente të vogla, të përditshme njësoj siç trumbetohet edhe vënia e një llambe nga kreu i bashkisë.
E njëjtë ka qenë edhe ngjarja e djeshme ku edhe pse fatmirësisht nuk kishte viktima apo dëmë serioze, është fatkeqësisht e tmerrshme sa i përket punimeve që bëhen në Tiranë. Në të gjithë gjatësinë e saj, pista e re e biçikletave që ka pak kohë që është përfunduar së ndërtuari nga Bashkia e Tiranës, nuk ka mbrojtëse anësore. Në shumë pjesë të saj, ajo madje i afrohet aq shumë ujit të Liqenit, saqë paraqet rrezikshmëri të lartë për përdoruesit e biçikletave në Parkun e Liqenit. Këta të fundit e kanë ngritur këtë shqetësim disa herë pranë Bashkisë por kjo e fundit nuk e ka parë të arsyeshme të marri masat e nevojshme.
Shumë prej restaurimeve dhe punimeve të kryera në kryeqytet, me gjithë dëshirën e mirë dhe zellin propagandues, nuk janë asgjë tjetër veçse fasada e një pune që mban etiketë kineze, njësoj si shfaqjet e kreut të bashkisë në rrjetet sociale apo edhe fjalën përshëndetëse për Vitin e Ri Kinez. /Boldnews.al/
