Rreth mesditës së të hënës do të zhvillohet një mbledhje e Asambleve të fakulteteve të Universitetit të Tiranës, ku pritet të merret edhe vendimi përfundimtar lidhur me grevën e paralajmëruar të pedagogëve.
Aktualisht ka një vendim të Asamblesë së fakultetit të Shkencave Sociale lidhur me nisjen e një greve nga pedagogët, ndërsa i është drejtuar një apel studentëve për t’i mbështetur në këtë vendimmarrje.
Por vendimi përfundimtar, pra nëse ky vendim i Asamblesë së FSHS do të mbështetet edhe nga kolegët e tyre në fakultetet e tjera të UT, pritet të merret në mbledhjen e përbashkët të tyre që do të mbahet rreth orës 11:00.
Me shumë gjasë pritet që Asambletë e secilit fakultet të solidarizohen me grevën, e cila minimalisht do të zgjasë 1 javë dhe nëse qeveria nuk ka ndonjë reagim lidhur me kërkesat e parashtruara që kanë të bëjnë me shfuqizimin e VKM të fundit të qeverisë si dhe Ligjit për Arsimin e Lartë apo shprehjen e vullnetit për t’a abroguar atë, atëherë pritet një tjetër vendim, për një grevë pa afat.
Greva e pedagogëve pason atë të studentëve, e nisur në fillim të dhjetorit, dhe që vazhdon ende, pavarësisht përpjekjeve të qeverisë për të minimizuar atë apo për ta kapur protestën, sikundër paralajmëroi Kryeministri Edi Rama.
Një ditë më parë, Kryeministri Edi Rama nuk kurseu akuzat ndaj trupës akademike, ndërsa në një bashkëbisedim me studentë të përzgjedhur të fakultetit të Mjekësisë, ka kërkuar prej tyre që t’u kërkojnë llogari pedagogëve, për cilësinë e titujve që kanë dhe për mësimdhënien e tyre. Po ashtu, Rama u tha studentëve në një takim tek Mjekësia, se pse nuk shkojnë ta nxjerrin rektorin jashtë shtëpisë së tij bashkë me fëmijët, e të shfrytëzojnë banesën për mësim.
